雙連坡史話（一） 四水歸塘

【文、圖∕徐貴榮∕國立中央大學客家語文暨社會科學學系兼任助理教授】

 

「雙連坡」在平鎮區个北片，中壢市街西片，無幾遠仔中央大學北片个「樹林仔」就係平鎮區个盡北片，這下係平鎮區高雙里个一部分。從中壢出發，跈等114公路往新屋方向大約四公里个所在，北片有兩隻陂塘相連，故所安到「雙連陂」。聽講因為日本時代个地圖公文書項，因為無漢字「陂」這隻字，就用土字片個「坡」來代用，分人一看啊去嗄恅着兩條崎連等。

客人對國語「水池」講「陂塘」抑係「魚塘」，這「陂塘」有天然生成个，也有人工開个。農業生產定著愛有充足个水來蔭田，客人耕山耕田，大部分在丘陵所在，無就較高岡个地方，無大河壩，坑水又細，無罅水好耕種，先民來到這兜所在開墾，高不將就發揮高度个智慧，利用當地土地个特性，開陂做圳，保存水資源，利便灌溉，提高產量。

講着「陂塘」个「陂」這隻字，頭擺寫个時節還有一隻「左耳片」加「自卑」个「卑」字（陴），學老人用「土字片」加一隻「自卑」个「卑」字（埤），到今台灣那位仔个地名抑係陂塘名，做得講全部就用這隻土字片「埤」。其實愛用土字片加「皮」个「陂」正著，國語讀「ㄆㄧˊ」，意思毋著，佢古韻有「彼為切」个音，切出來堵好同「碑石」个「碑」共音，意思係裝水个「水池」，其他「左耳陴」、「土片埤」都無「水池」个意思，音乜讀piˇ毋著。雖然講「土皮」个「坡」，古書《說文通訓定聲》講同「左耳皮」个「陂」有共樣个意思，毋過到這下國語係「崎」个意思，像「新坡」、「大坡」、「雙連坡」、「坡心」个「坡」又係「陂塘」个意思，當會分人誤會。

桃園係全國有名个「陂塘之鄉」，聽講全市頭擺有萬過口陂塘，大部分係人工開造个，正少數係天然本來就有个。聽雙連坡附近个人講，這雙連坡係天然生成个，開發个先民來到這位該時就有吔，四片析个水集揫到這兩隻陂塘，淰吔正經過陂塘頭前个伯公祠「雙隆宮」（圖2）脣項流下去，安到「四水歸塘」（圖3）（註），又聽講來這開發个劉璞珍風水做到陂塘該片，每年春來掛紙，雙連坡个水係忒淰，子孫還愛坐船去掛紙咧！。

這下个雙連坡，因為石門水庫个水利方便，毋多使用着陂塘个水吔，從雙隆宮看啊過去，右片該口較細，早就生草遇礙，看毋多出頭擺係一口有名个陂塘，單淨伸着左片該隻還完整保留（圖1），看啊去！水清淨利，好天時，一色晴天，水面有兜仔搖搖激激，金光跡亮；臨暗時，面對陂心，陣陣清風吹啊過來，所有愁慮，全攉淨淨，實在清爽。
雙連坡係一隻好地方，係講好好來整理這兩口陂塘，加入附近宮廟、南方莊園，自行車道，發展休閒觀光，定著又係一隻當好个賣點。（本文以四縣腔寫成）

註：四水歸塘：原稱「四水歸堂」，雙隆宮內碑文亦寫「四水歸堂」，原意為「房子各屋面内側坡的雨水都流入天井，寓意為水聚天心」。然本文所指為附近水流都流入「雙連坡」這兩座池塘，故取其諧音稱為「四水歸塘」。

圖 1 雙連坡（徐貴榮攝 1010429）

圖 2 雙隆宮（徐貴榮攝 990613）

圖3 雙隆宮簡介石碑第三行下到四行書「四水歸堂」（徐貴榮攝 990613）

徐貴榮教授 聲檔 - 雙連坡史話（一）四水歸塘

▲BACK