心

【文／羅肇錦∕中央大學客家語文暨社會科學學系榮譽教授】

 

從古到今，用來思想个東西，漢字全部用心去想，毋係用頭用腦去想。故所客話也用「心肚想」、「心肝肚想」，毋係用「頭那想」、「頭腦想」。還較生趣个係有心思按到有心，無心思按到無心，毋係按到有腦無腦。再下去，「三心兩意」抑係「一心一意」全係用心毋係用腦。心在肚腹項，毋係在腦項，大家正會講「天下無難事，只怕有心人」，自從毋識聽人講「天下無難事，只怕有惱人」。

客話肚項用心來創造个常用詞，大部分係講毋好个事情，像「心野野」、「心神毋定」、「花心」、「心花花」、「聽到毋順耳个事情心火會舉起來」、「細人仔毋聽話大人會心焦」、「心術不正壞心腸」，都係講毋好个事情。講好个少加當多，較輒用个就「心肝仔」、「心肝寶貝」、「心心相印」、「盡心盡意」，大概係從官話借來个詞彙。

還過表示憂心愁慮無葛無煞，就講「心肝窟隱痛隱痛」、「心肝頭拶拶」。無就譴到過格就講「心肝強強會著火」。當然也有「心情平和」、「打屁安狗心」等等，用來請人安心寬心，毋好動阿著心情毋穩，怨生怨死。

這兜心字个用法也係壞个比好个較多，可見人个心，到底還係壞心比好心較多哦。

古人講：「心字頭頂一支刀」，就係講「忍」這隻字，可見做人實在難，一年透天就愛忍耐，忍到好心著雷打，還係愛繼續忍，忍到天荒地老，忍到人心餵狗食。


羅肇錦教授 聲檔—心

▲BACK