詔安有情客來坐

【文、圖／李幸妃／國立中央大學客家語文暨社會科學學系客家研究碩士在職專班畢業生】

 

講著在講客廣播電台，做詔安腔个節目，這對𠊎來講和讀書、寫論文係全然無共个兩件事。節目開播遐下，又係𠊎研究所學位考試，值討口試个時，遐幾下日个心情真經係若吊十五個水桶在共款，按七上八落晃啊晃。一想著會用用𠊎熟事个詔安客事來做廣播節目，有影係真難得个機會擱係打頭陣个事頭，照理講係愛煞著兜拁接落來正著。毋過，擱想著現現研究所个學位考試討到位啊，嘛係愛量時間來準備，有影係想到頭那滿足疾个!心肝底若像在揪大索共款，到底係討做抑係莫做？落尾，真額拁想幾下日了後，猶係拁接起來啊！
坦白講，起頭下正在學做節目，實在吂落穢。像講愛仰子邀請來賓？來賓討和大家分享麼个？攏愛先和佢人討論，得佢人安心。紹介雲林在地有麼个產業、有麼个活動等等个消息，𠊎嘛愛先去了解、先想便。雖然事頭真多，毋過，若做嗄感覺若好賞嘛若心色。可比講：來賓一開始聽著在廣播節目內底，愛歸下用詔安客事來講事，逐儕即著掣，目珠捉𠊎金金䀴，佢人會感覺膽膽、驚驚，擘心會講毋著，驚人會聽無、會聽毋識。
落尾大家話題一講落，客事係一儕比一儕較會講、較滑溜，生活經驗一件一件分享得人知，全然䀴毋會出會驚場和緊張，錄音室內底不時係笑聲、笑事連天。


詔安个鄉親實在係真得人惜！
節目除了紹介詔安客事、客庄大細事以外，嘛希望得大家聽會著詔安腔个音樂！真無採，詔安腔个創作實在係有較少，無法度分享堅多个音樂得大家聽，所以，𠊎在節目安排一兜四縣腔个歌曲得大家欣賞，正擱翻做詔安腔講得聽眾朋友知。透過對譯去了解各種語言个靚，𠊎按做係毋係一兼兩顧，摸蜆子兼洗褲咧！詔安腔在臺灣算講係較特別个腔調，𠊎用歡喜个心、認真个態度，來做「詔安有情客來坐」這個廣播節目，希望拁這個𠊎心肝底頭靚、頭特別个腔調，講得大家來了解、熟事。
「各位聽眾朋友大家好，歡迎收聽詔安有情客來坐，𠊎係詔安妹--幸妃…真歡喜喔，會用在逐禮拜个拜六晨早，和大家在講客廣播電台，用聲音來答嘴鼓，交朋友。歡迎大家多多指教！」（本文以詔安腔寫成）

(詔安腔)
李幸妃聲檔 － 詔安有情客來坐

▲BACK