客家話个「做」摎「作」

【文／彭瑞珠／國立中央大學客家語文暨社會科學學系客家語文碩士班畢業生】

 

有人講客家話，無字！哪來个字？乜有人講客家字，唉唷，自家鬥个，看都毋識！
阿瑞珠實在異毋知死，今晡日毋單淨愛來摎大家講客家話，還愛問大家，識字無？還想愛講：「兜个客家話比起華語，有較精緻！」敢有可能？
該，就對「做」摎「作」，這兩隻字先來講起。「做」摎「作」這兩隻字，用在華語大家通棚都怕看有。毋過，你係毋係同𠊎共樣，成時會分清楚，係愛用「做」？還係愛用「作」正著？比論講，係「製做」，還係「製作」；係愛「做對」，抑係愛「作對」？
到底，「做」摎「作」這兩隻字，有哪位爭差？係用華語來講，怕異難摎佢兜講清楚：因為，這兩隻字个語意異相近，華語个語音又完全共樣，都講做「ㄗㄨㄛˋ」。這兩隻字，像係「一粒瓠仔破出來个兩隻瓠杓」，講佢盡相像，又異像無共樣。
因為，這篇文章有提供音檔，係講你有打開音檔，聽阿瑞珠講吔恁久，該，你早就聽清楚吔：「做」摎「作」這兩隻字，兜用客家話來講，全全就無共樣。這兩隻字，雖然聲母共樣係「z」、韻腹共樣係「o」，毋過韻尾無相同、聲調乜無共樣。故所，「做」還「zo」、「作」還「zogˋ」，仰愛使搞毋清楚？
比將講：你係講愛「做事」、「做工」、「做手腳」，無就「做兵」、「做鬼」、「做乞食」；你定著毋會寫到「作事」、「作工」、「作手腳」，還係「作兵」、「作鬼」、「作乞食」。係愛講「發作」、「耕作」、「動作」，還係「作壩」、「作䃗」、「作躁」；乜毋會寫著「發做」、「耕做」、「動做」，還係「做壩」、「做䃗」、「做躁」。
還過「作怪」、「作亂」，你乜知愛用「作」，毋會「做」摎「作」分毋清楚。因為，你曉得講客家話，知講「作怪」、「作亂」摎「做怪」、「做亂」，講起來無共樣，意思乜有爭差。故所講，客家人比起華語人，較了解「作」這隻字。
比論，會講：「細人仔當『作肉』，愛分佢食加兜仔。」、「啊哦，𠊎怕係熱著咧，毋知仰會緊『作渴』」。這兩句話，係轉做華語來講，任轉，都轉無原本个客家話恁烏。因為，「作」這隻字在華語个入聲韻尾早就消失忒吔，聲調又恁堵好歸去摎「做」共樣共樣。故所，原本「作」這隻字裡肚个「造就、培育」个意思，在華語裡肚乜就弱忒咧。
俚客家話个日常用話裡肚，還保存異多「作」這兩隻字个詞彙，「做」摎「作」个語音又分到清清楚楚，有兜較古个用語、用法，就做得安全个保存在客家話裡肚，總愛兜肯用、肯講。故所，𠊎正會講「兜个客家話比起華語，有較精緻！」這下，你怕肯信兜仔吔嗬？
有兜人會認為「客家話，當土！」係因爭，佢兜無恁好个機會，做得去理解客家話裡肚个精緻摎內涵。這下，兜就做得在中央大學个電子報，看客家字、聽客家話，共下來學習。大家係肯講客家話，又會還較有機會，做得理解著客家話个精緻摎內涵。

(四縣腔)
彭瑞珠聲檔 － 客家話个「做」摎「作」

▲BACK