天年倒貶，朳仔打牛眼

【文、圖／彭欽清／國立政治大學退休教授】

 

「天年倒貶，朳仔打牛眼」這句客話係用來講天地萬物之間各種个反常現象。舊年台灣當多平洋位所冷到落雪，老人家都講一生人吂識見過；今年六月一陣又一陣个梅雨，又斗又急，在台灣个北中南部來來去去，落在哪，哪就浸水，各隻行業都食着屙糟齋。前成個月仔，中國大陸同墨西哥有大地動，美國連續來兩個大颶風，當多美國人畀搣到丟丟滴滴。

人類因爭折福慣了，麽个就大開大使，無想着恁遽自家就嚐着惡果，歸隻仔地球，日見日暖化，熱天輒輒熱到三十七八度，寒天寒到平地也落雪，恁樣个天時，毋「天年倒貶，朳仔打牛眼」都難。

還過全世界做得講人禍無斷，一哪仔就有恐怖攻擊，一下仔歐洲，一下仔美國，無就中東。信無共樣教个抑係無共種族个人，相賽㓾來㓾去。當多國家个領導人同政治人物又當好詐癲食狗屎，毋係好講假話就係惡桀桀仔愛食忒人樣仔。盡壞樣相个，國際項有美國總統同北韓个領導人，台灣有一拖拉庫个政治人物乜真有挷。盡慘个百姓看着擎頭个人恁樣，有樣學樣，一個比一個惡，一開嘴就了少話，


動啊着就頸橫橫仔，麼个傷天害理，麼个積惡个事情就做得出來，故所就算㓾爺哀，㓾子女，也毋會判死刑。恁樣是非善惡不分，恁樣無王無法，天下仰會毋亂，上天仰會毋責罰？

毋過，話又講倒轉來，這下科學恁進步，各種果子緊改良緊大粒，緊好食，有个還一年透天就食得着。有一日，正經會「天年倒貶，朳仔打牛眼」也怕毋敢話。

(四縣腔)
彭欽清聲檔 － 天年倒貶，朳仔打牛眼

▲BACK