狗食薑嫲屎

【文、圖／彭欽清／國立政治大學退休教授】

 

原在有一儕人盡好帶等一條狗仔同一隻雞嫲一哪去遶尞，睡就睡在廟項抑係亭仔下。食還較簡單，狗仔食佢屙个屎，雞嫲食狗屎，佢食雞卵。就恁仔哪就遶透透。當然，這係講天缺。
毋過，原在个狗仔確實係食屎个，係無仰會有“打屁安狗心”這句客話。
頭擺在莊下，大體人屋下都會畜狗仔來𢯭掌屋，講畜講好聽，大體仔就淨餵佢食人食伸个東西，有時還會喊細人仔屙屎分狗仔食，狗仔跈在細人仔个屎朏背等屎食个光景老一輩个人應該盡輒看着。
有一句客話講：“狗食薑嫲屎”。薑嫲係辣个，人食了薑嫲屙个屎乜會辣，狗仔食啊着就會喊毋敢了，下二擺鼻啊着有薑嫲羴个屎，就會尾㘝㘝仔瀉走。這句話同“分蛇咬過一口，看着稈索就走”意思差毋多。
好在這下个狗仔無食屎了，係無，照這下恁多人好食辣來講，狗仔會擇無屎好食。

彭欽清音檔 — 食飽吂

▲BACK