「糶糴」村到底愛仰仔唸？

【文圖∕邱秀利∕國立中央大學客家語文暨社會科學學系客家語文碩士班】

 

（糶糴村的看板有注音符號。）

恁久網路項蓋時行个兩隻字「糶ㄊ一ㄠˋ糴ㄉㄧˊ」，對𠊎來講，實在係在熟毋過个，因為，𠊎就係竹田鄉人，歇在竹田，還細讀國民學校个時節，有蓋多同學就歇在「糶糴tiau tad」，講實在該時節，𠊎對這兩隻字，真是，盡有印象，還細人个時間，毋查字典該習慣，總係，有邊念邊，毋邊就念中間，𠊎等都念「糶糴」tiau tad，國語樣仔念真是毋知，壞蹄了！筆畫恁多，愛仰仔寫呢？𠊎係有方法記个，這兩隻字，𠊎都記左片个地方，出米同入米。

今晡日，去訪問鄉長、村長，正知，𠊎從係就念差了，𠊎念「糶糴tiau tad」，國語安到糶ㄊ一ㄠˋ糴ㄉㄧˊ，係毋著个。

以下這部份係村長个錄音：（請聽聲檔）

糶糴，𠊎等還細總係講糶糴tiau tad，也係𠊎等這附近恁樣講法。佢其實係照佢个意思來講，糶米同糴米，應該愛念糶糴tiau tag，「糴tag」米同糶米，這个音已經走忒了。糶糴tiau tad、糶糴tiau tag。
糶糴tiau tag，糶tiau个意思就係賣米，糴tag買米个意思。

（本文作者與糶糴村村長李豐桂合影。）

實際仔這个名稱，頭擺人就講達達庄，後來又講達達港，以前个名稱就係抑樣。後來，光復過後有改名，毋係盡有意思，又改糶糴ㄊ一ㄠˋㄉㄧˊ，客話就講糶糴tiau tag，就是糶米、糴米个意思。清朝時節還無水閘門，毋過个時節水量蓋大，隘寮溪該都還無恁大水量。後來在分洪，水量無个時節，沒辦法，日本時代就蓋水閘門係為了灌溉放田水用該，後來達達港無功能，就徙到頓物潭交官。

根據耆老个口述同史料个記載，有隻歌謠係這麼唱的：「頓物潭，金米籮。磐船米，銷國外。」就講出了達達港、糶糴村當年个重要地位。

村長个姐仔還講一个古分𠊎聽：「還細時節，日本人，因為有宗教信仰个問題，故所，會一家一家去操神像，大家就會庰起來，等日本人走了，在拿出來拜。有一日，𠊎老弟就趁爺哀去田坵做事个時節，同神像拿出，講好聽係同神像洗身，其實，係該年代無麼个好稿，拿出來這搓該搓，結果，搓仔太大力，手就斷忒了，隔壁鄰舍就會講，𠊎等屋下个神像拿出來開光。」

糶糴村有敬字亭、伯公廟、花、弓蕉…等等，有入來屏東，請斡入來糶糴村來坐尞。

拜訪鄉長，在打嘴鼓个時節，鄉長講糶糴tiau tag做麼个會變糶糴tiau tad，佢乜無知，音變呢？還係因為前面加了麼个音在同糴就變成tad，明明係念糴tag米，應該就愛念糶糴tiau tag，希望有學者來研究。
（本文以南四縣腔寫成）　

邱秀利 音檔—「糶糴」村到底愛仰仔唸？

（本文作者與竹田鄉鄉長傅民雄合影。）

▲BACK