眼

【文／羅肇錦／國立中央大學客家語文暨社會科學學系榮譽教授】

 

「眼」字最早个用字係「目」，看「目」字个打橫放，就像人个目珠，帝中係目珠仁，四圍框起來个就係歸粒个目珠。故所目字係盡原始个象形字，同山水日月鳥烏人----等等，全係簡單基礎个象形漢字，後期又過用形聲个方式創出「眼」字。
雖然「眼」字係後出个字，無過，在各個方言肚，「眼」字比「目」字用處還較多，像字眼，打眼拐，無眼水，眼精精，畫眼，牛眼，鬼眼竹，瞎眼，轉眼，眼黃鼻花-----等等。顛倒「目」用在較偏个形容性个詞彙，像節目、目標、目前、目陰目陽、目神、目花花，除忒目汁、目珠、目眉毛、目朦、目屎幾隻目珠有關个基礎詞以外，都用在書面項像目中無人、一目了然、過目不忘、目空一切。故所這位淨分析同「眼」有關个詞彙。
基礎个目珠有關个名詞，有眼白、眼紅、眼青、眼烏、眼光；進一步用在形容性个有無眼水、無眼光、順眼、逆眼；動物眼來形容个有狗眼、龍眼、牛眼、貓眼、賊眼、鬼眼竹；表示時間个有眼時、轉眼、撮眼花、過眼關；其他修飾性个有打眼拐、畫眼、眼黃鼻花、牙研目皺；還有重疊个形容有眼視視、眼精精、眼凝凝、眼騃騃、眼瞪瞪。
這些同眼有關个詞彙雖然看起來及平常，但係有兜特殊詞驚怕當多人無記得係麼个意思。像無眼水係講人無眼光，打眼拐是用眼睛暗示，眼時係講現在，鬼眼竹係有紅線條个竹仔，無打眼係講不夠、不起眼，有佢同人無共樣个所在，可能毋使幾久都會分人豁淨淨，故所在這過提醒一擺，加添若个印象，看有辦法留較久兜仔無？


羅肇錦音檔 — 眼

▲BACK