食飽吂

【文、圖／彭欽清／國立政治大學退休教授】

 

客話个問候語，較輒用著个，『恁早』同『食飽吂』這兩句可能排得著頭幾名。朝晨頭初下碼見面就大體會講『恁早，恁會早』，順續問『食飽吂』。食晝食夜邊仔相堵頭，乜會問『食飽吂』。比起來，講「食飽吂」个機會怕比講「恁早」多加異多。
問人食飽吂愛看場所，毋係哪就問得。比將講有人對便所行出來，就做毋得問佢食飽吂，毋適當乜失人禮，除非講兩儕人當熟事，做得講笑，毋會變面。
原在人屙屎愛去豬欄下个糞缸屙，有一個安到阿貴仔个，有一朝晨屙啊忒出來，緊行緊繫褲帶仔，堵好遇著隔壁个阿宏仔，這隻猴仔盡好刁人古董，佢開嘴問阿貴仔：恁早呢，食飽吂？阿貴仔應講：食飽了。阿宏仔續等問：怕異鹹喔呵？阿貴仔正知分這隻孤無頭批走了。
阿貴仔緊想緊毋甘願，想愛倒 轉來。有一朝晨，䀯著阿宏仔去糞缸下屙屎，就在糞缸門脣掌等，看啊著佢行啊出來，就大嫲聲問佢：恁早呢，食飽吂？阿宏仔聽啊著，隨口就笑笑仔應講：吂喔，你無食，𠊎仰敢食？趕燒你先食，𠊎還有事情無陪你，失禮喔。
想愛報冤仇，無想著顛倒續扡著一堆屎，阿貴仔自家鼻公一摸，想倒轉來，有恁即靈个人做鄰舍，乜算係福氣，總有一日會畀教精。

彭欽清音檔 — 食飽吂

▲BACK