刺藨仔

【文、圖／羅肇錦／中央大學客家語文暨社會科學學系榮譽教授】

 

從細到知人我，就歇在山項，逐日拈羊尾打草蜢，收鳥卵、食野果，像牛核卵、鹽酸仔、黃藤子、馬甲子、牛屎烏、刺藨仔等等。
先來講刺藨仔。目前客家界講到刺藨仔就想到草莓，涯認為草莓係草莓，刺藨仔還刺藨仔，末混雜起來講較好。因為草莓係三十零年前非洲傳來介外來果類，同亞洲本土所產个刺藨仔全無共樣。在中國古書早就記載這種東西，客話刺藨仔就係當早个講法留下來个。比將爾雅釋草就有記載「藨莓」植物名即莓也，郭璞注今江東呼為「藨莓」，子似覆盆而大。在湖南（早期楚國）各地方言都有「藨」這種植物，像長沙、湘潭、衡陽、簍底、雙峰、新化、邵陽、武崗、祈陽都有這種草菓的講法，發音po或pau ，同台灣客家四縣講po1，海陸講pau1相近相通。廣韻也記載「藨」豪韻普袍切，「醋梅可食。」，另外這種醋梅的莖葉帶刺故所按到「刺藨」。長沙方言詞典還記載：
三月藨：農曆三月成熟，顆粒較大似草莓。
農船藨：農曆四五月間成熟，時值端午龍舟競渡之際，故名。
烏藨：新化謂顏色紅至烏者謂之烏藨。
長沙諺語：六九五十四，烏泡子發嫩刺。
桑葉藨：桑葚。
茶藨：油茶樹上的果實，有的呈橢圓形，有的狀似耳朵。
從上背个記載做得了解「刺藨」是遞藤有艻，果子像桑仔子，由當多細粒擠共堆，熟架下就變到圓圓紅紅一大粒一大粒个，酸甜酸甜个果子。
恁樣看來草莓，係外來種又大又甜的草類種植所打个按到現代草莓，「刺藨仔」係傳統各遞藤有艻酸酸細細粒个按到刺藨仔。分開來用較好代表無麼共樣个東西。由其現下人無種傳統个酸刺藨仔，市場上有賣个全部係草莓，當少人之刺藨仔係樣仔个東西。
時代進步，跈毋到腳步就會分人淘汰，對刺藨仔來講係一種傷感情个事情。

羅肇錦音檔 －刺藨仔

▲BACK