南非个五月節趣談

【文圖∕彭碧珠∕寄自南非德班（Durban)】

 

五月節乜係恩俚客家人个大節日。尤其戴在南非恁遠个娾，逐年為著買大量个粽葉摎包粽仔、打艾粄个食材，正經異費精神吶！

（在南非德班愛準備恁多包粽仔个料，正經無恁該。）

記得十年前个五月節，也恁堵好該年个天時—農場種出千擔菜頭，曬起歸埕菜脯；地利—德班公/商會摎中文學校合辦園遊會；人和—堵堵屋下人無出張去外地，人員盡齊，所以在全家齊心合作之下，斯半個月內就前前後後賣出超過一千五百只米粽，九百只焿粽，還過八百只艾粄个紀錄。

乜斯因致該年个旋風起湧，嗄捲起日後一陣陣搶買客家粽、客家艾粄个浪潮。所以，恁多年來，見擺五月節一到，盡多人就會煞煞問便：「彭老師，請問您今年有包粽子、艾粄賣麼？」哈！這包粽仔、打艾粄嗄變娾除了教書以外个臨時副業摎甜蜜个壓力囉！

講著這包粽仔，吾媽媽識講過：「北部客人粽，係摎米炒半熟後，硬蒸到全熟个；南部學老粽，就係包生米粒，用大鑊水煠到熟个。做法雖然無共樣，口感也不同，但係各有特色！」姖老人家教娾：「糯米愛浸濡、浸透；炒米時節愛記得先放兜蒜茸（蒜泥）落油肚煸香；烳爌肉，用三層肉最湛斗；香菇浸軟洗淨切垤仔後煸香，放兜爌肉个𤓓味翻炒入味；蝦仁愛浸軟炸透返轉金黃色，正毋會臭腥味；菜脯洗淨剁幼乾炒後，摻兜香蔥油攪勻。地豆、芋角、豆腐干或者卵黃，就隨人合意，有放也好，無放也無關係！」

（送分學校个先生一儕一盒艾粄，面項放一張紅紙，表示謝意。）

（大人細子學做甜粽學到當認真，係盡生趣个DIY活動，右一係筆者親身示範。）
炊艾粄个要領斯係娾自家研究出來个。頭擺娾家娘識教娾：「炊粄，最驚炊昶過火⋯⋯看著該炊出袈蓑衣仔袈蓑衣个樣仔，心情仰般个鬱卒，妳敢知？所以，測時間盡重要，差毋多燒一枝香過就好。總係⋯娾到今還係測毋會準，見擺開蓋時節，心情斯像開獎共樣噗嗟！噗嗟！」當年還吂三十歲个娾聽著後，頭腦斯開始停動：火力摎時間个關係；粄肉滾咧摎熟咧之間个變化；粄肉在蒸汽中一次炊熟摎半棧仔有開蓋散熱一下个差別⋯⋯等等多方面个考量之下。娾發覺著「15-5-5」个時間最理想，包您做得炊出又靚又好食个粄來唷！

（愛打艾粄、包粽仔，還愛教細人仔畫國畫，右六企等著青衫者係筆者。）

今年个五年節前，娾因為無閒校務，尤其活動該日，又合安排「教畫圖」个節目，所以娾減少工作量，斯包六百只艾粄，還過負責包分師生享用个二百只齋粽仔定定。心臼盡煞猛，也盡配合，姖也敢認隻攤位來賣到「嚇嚇叫」，斯兩點鐘久定定，艾粄就賣淨淨嚕！看著無娾協助企攤招客个情況下，鄉親照常相湊搶購个場面，正經使人盡感動哩！斯像恩俚客家俗語講个：在「新例莫設，舊例莫擲」个原則下，娾相信這五月節个包粽仔、打艾粄个禮俗，應該還會在遙遠个南非延續下去正著！（本文以海陸腔寫成）

（五月節包粽仔、打艾粄个禮俗，還會逐年在遙遠个南非傳下去。）

彭碧珠 聲檔—南非个五月節趣談

▲BACK