山狗仔

【文∕羅肇錦∕中央大學客家語文暨社會科學學系榮譽教授】

 

客話名詞背尾，係講加一个「仔」（四縣唸ㄝ海陸唸ㄜ），就表示看輕、表示較細，較等人惜个意思。像老貨仔（沒有用的老人）、屙夭仔（沒有用的閩南人）、虎膦仔（誇大不實的人）、高毛仔（壞透的人）、山狗仔（跳皮的小鬼頭）。

這兜有仔个比無「仔」詞，淨用到一般名詞，山狗指山頂个狗仔、山猴指山頂个猴子、黃病指黃疸病、夭壽指短命，就沒有表示看輕、表示較細，較等人惜个意思。

故所講「山狗仔」無麼有罵个意思，顛倒有講該隻細人仔當跳皮、當機靈，係虛貶實褒該意思。大家就知山項个狗仔命當賤，頭擺人愛食就無个時代，狗仔一日食一餐，淨飯合蕃薯，粥水一兩杓。較好彩架下，加兩垤骨頭就食到頷頭拂尾。無食飽就自家去山項打獵，捉兜仔竹雞、蛇哥、蛤麻。下把仔還會打著山羌、鰱鯉，該就盡澎沛、盡好額了。

從苦个角度來看，客家早期个狗仔，過日仔實在艱苦，半飢半餓全無好食。客家諺語肚正會有「打屁安狗心」，這句話係講主人無東西餵分狗仔食，將就細人仔屙屎就嘍狗來食屎，一舉兩得，狗仔實著東西，地泥又屏到淨淨。這種做法慣了過後，狗仔見聽到，抑看著著肚底褲仔个細人仔打屁，就遽遽走過來，栳到有屎好食，哪知正打一粒屁定定，麼介都無等著，這就安到打屁安狗心，實在冤枉到高毛。

講到這，可見頭擺人苦到屙痢肚个時節，山狗比人又還較缺虧，連痢肚就無好食。一下想起來，無搖頭抑會落頸莖。 照恁仔看來，不管山狗也係山人，命靚盡重要，出世毋著時代抑係出世毋著所在，就會歸生人勞勞碌碌賺毋到來食，相同个道理，係講出世到安定个時代，出世在豐榮人家，該就變成食有肉飯有足个等人惜个山狗仔。（本文以四縣腔寫成）

羅肇錦教授 聲檔—山狗仔

▲BACK