畫一條大虎膦分你擎

【文∕彭欽清】

 

在台灣，講人講話毋實在，客話會講 「畫虎膦」，學老講 「wei ho lan」，連華語都受着影響，講「唬爛」。

虎膦，係公个老虎个下身。原在人講着老虎，總係想着佢會食人，就驚到會死，盡少人識看過，就講有遇着，乜怕會遽遽走到尾瀉屎，驚畀食忒。怕無幾多儕有心性去看啊虎膦到底生來有幾大仔。
老虎既然係百獸之王，厥膦應該毋會細正著。有幾大仔呢？無人講得明。打嘴古个時節，見講着虎膦，大家就相賽摎佢膨風膨到愛大又愛大，客話就講“畫一條大虎膦分你擎。”

世項个人百百種，大體人講話都異實在，有兜人就較好喋大話，三分講到十分，無个也講到有手有腳； 應人應到一千擔，講這佢會去做，該佢會出幾多錢，結果做無半項，這種人就係“虎膦仙”。 虎膦畫到無幾多儕人擎得贏个， 就係“大虎膦仙”抑係“虎膦大王”。

逐個莊頭總會有虎膦仙，大家明知厥話毋係膨風就係歕雞胲，毋過看着佢講到恁落文，恁落力，講到比手畫腳，就任佢去畫，看畫得着有幾大仔。下擺仔雞胲仔歕到噼忒，聽个人又去揰厥空頭，就會相詏仔，等到分人兜腳兜橫橫，正貓舐朘樣仔，面舐舐仔，鼻公一摸，這種莊頭莊尾輒常看得着个場面，又乜算係原在莊下人个娛樂。

平常時打嘴古，虎膦仙自家仰仔膨風仰仔雞胲，僅可分人過嘴定定，影響毋係盡大。大眾个事務就無共樣，擎頭个人係講虎膦轟天，該就會害死人。民主時代，無論麼个選舉，隻隻候選人就畫大虎膦分選民擎，等佢選票騙啊着，選啊選着了，房頭內人同共黨派个人做盡畜到肥固固仔，大眾百姓雖然連愛好食就無，還係乖乖仔在該煞猛擎厥大虎膦。

這兜人開公家个錢像在別人个腳髀挼索仔—毋知痛。有預算無拿來用，白白無用，打水漂仔乜愛用各種名義同佢使淨淨，滿那仔 就緊委錢，下二屆選舉，正會有票，預算毋罅就來編特別預算，再過膨風，再過歕雞胲，講這兜錢係為着後代子孫來設想个，這下開幾百億仔，等歸隻案仔做好，就會有幾多千億个效益，大眾百姓還係朘朘在該擎大虎膦。

老實講，老虎个膦大抑細，實在毋干平民百姓个漦事，係講政治人物一隻比一隻還較會畫虎膦，隻隻係虎膦大王，該百姓就會有屙糟齋好食，國家就會孤無絕代。原在老人家講个：政治人物个話係信得，屎就食得。嶄滿有影。

彭欽清聲檔 －畫一條大虎膦分你擎

▲BACK