〈𠊎个客家學院緣〉

【文∕彭玉錢∕國立中央大學客家研究在職專班畢業系友】

 

論真來講：𠊎到這下有成時，還毋敢相信自家既經係中央大學客家學院在職專班畢業个研究生了。敢係！從頭到尾𠊎个心肝肚，就有一條幼線䌈等客家學院？係無，該年焗屎噴天个𠊎，心仰會轉斡了，敢講，這就係𠊎同中央大學客家學院个緣！

2003年8月，中央大學起頭成立客家學院，𠊎个朋友同𠊎講：(イ恩)兜來去客家學院參觀好無？該央時𠊎麼个都無想就回佢講：無愛，𠊎無興趣啦！該同𠊎一息仔都無關係！朋友講：你仰般會恁樣想，毋著哦！妳係客家人呢！敢講妳無想愛對妳兜个客家做研究？還記得𠊎沙鼻摝天同佢講：這下係多元文化个時代，還分麼个族群！係有麼个愛知得个，問吾姆就好了，佢從小在客家庄出世，無麼个事情係佢毋知得个。

哪知，一年後，吾姆病院戴十日嗄分觀音娘接走了！有影係對應到俗諺講个：「天有不測風雲、人有旦夕禍福」，敢講，這就係天公伯分𠊎个責罰，責罰𠊎背祖了。礱礱舂舂个𠊎，緊愛天公伯同𠊎講，吾姆還後生，觀音娘樣會盼得同佢接走？𠊎屋前屋背，樣般就係尋毋到吾姆个身影。頭擺𠊎日常生活个大細事，無論歡喜抑係傷心个，同吾姆講个時節，子哀仔會凴著圓身，就像細人仔該下共樣。目汁闌干个𠊎，歸日企坐毋核，毋知愛仰結煞正好！

吾姆過身，分𠊎个打擊盡大，逐日星光半夜了，還係睡毋落覺。𠊎想愛尋轉𠊎消忒个阿姆，嗄毋知吾姆到底在哪仔？故所，𠊎開始尋客家、親近客家，𠊎毋知自家心肝度該條幼線到底係愛䌈在哪位？有一擺𠊎去社區大學上客家課程个時節，堵好有一个同學同𠊎坐兩隔壁，佢係中央大學客家學院个學生仔。𠊎摎佢請教一兜客家个問題以後，就下定決心愛去考中央大學；客家學院在職專班个研究所，講起來人生个緣分真經係盡生趣。

中央大學客家學院該位所在中壢，外表淨淨俐俐个客家學院係一棟盡高大又正正个建築。旁脣有靚靚个中大湖，湖中央五光十色、水波粼粼，有雲个影、樹个影，還有一兜鳥仔會來跳舞，盡餳人，象徵科技个光電大樓同佢來作伴。客家學院裡背囥等淰淰个客家知識，寒來暑往，佢毋驚日頭曬也毋怕狂風暴雨打。逐日都恬恬、硬頸又盡砸磳恁樣企正正，歡頭笑面摎學生仔擛手，愛大家無論係麼个族群，共下來研究客家个語言同文化。

其實，客家學院真經係𠊎个救星。入來客家學院以後，𠊎正慢慢仔打開客家知識个大門，在研究所毋單淨係接受無共科系教授个指導，還做得跈等書項該兜客家先民个腳跡，乜像係同吾爸吾姆共下開始來深入認識客家共樣。頭擺，𠊎話到自家係客家人，曉得講客家話，就係了解客家了，根本對客家一息仔都無了解啊！愛樣般正做得通盤來了解客家，係毋係𠊎愛先敲忒自家結个高牆，摎腳步踏出去，這係𠊎入來客家學院一定愛做到个事情。

有語言就有文化，一个族群生活个環境乜係一个社會，有盡多客家人該兜老頭擺个事情，比論講：語言、民俗、歌舞、戲劇…等，久了就變到係有價值个客家文化。(イ恩)兜後輩人仰會知得啊!俗諺講：「口講係風、筆寫係蹤」，客家仰會安到客家？係無用筆來記錄，時間慢慢過忒以後，就像風共樣無影無蹤了。故所，愛有人來做客家研究个事情，客家正做得人文都生根，世世代代正做得傳承下去，客家正做得永永遠遠生生不息。

客家民系係仰般來个？仰會講:日頭做得照到个所在，就有(イ恩)兜客家人，係從麼个時代開始就有客家了？頭擺客家人在大陸原鄉係發生麼个事情？有文字記載講：五胡亂華个時代，時常發生㓾人放火个事情，客家人驚到食睡毋得，為到閃這兜人禍，就歸莊趕緊遷徙。客家人遷徙个環境、戴个所在，有天災乜有人禍，經過五擺个大遷徙，經過盡多艱苦遷徙个環境，為到愛尋安全个所在，來建立家園，客家人一直遷徙係沒法度个事情啊！哪仔有好落食就哪仔去？

黃巢之亂以後，客家先民為到愛閃避災難，遷徙到閩、粵、贛三角地區，為到生活勤儉耐勞，係盡特別个民族。客家人係經過樣般个艱苦？客家妹仔係天足？同別个族群个細妹仔無共樣，因爭從小就愛勞動愛學習；婦人家愛負責家頭窖（教）尾、田頭地尾、灶頭鑊尾、針頭線尾。客家婦人家過身後个祖先牌也係墓碑項，樣仔會安到「孺人」？臺灣海峽又安到黑水溝，兜个老祖先為到愛來臺灣開墾新家園，輒輒係10去6死3留1回頭，臺灣從麼个時代開始有客家人？

𠊎係無進來中央大學客家學院在職專班研究所學習，樣會知得這兜祖先个腳跡，仰會去關心臺灣客家同世界各地个客家，經過一二百年後有共樣無？時代在進步，臺灣客家个傳統產業有麼个變化無？網路無國界，在臺灣華語係最流通个語言，族群个語言還有幾多儕曉得講？客家諺語講：「寧賣祖宗田、莫忘祖宗言，寧賣祖宗坑、莫忘祖宗聲」。外國學者史迪芬、平克講過：語言透過細人仔正會永遠流傳，係語言只有大人在該講，恁樣，這个語言差毋多就會滅忒了。

(イ恩)兜客家人係一等優秀个民族，客家學院打開𠊎對客家个眼界，𠊎盡歡喜同中央大學客家學院在職專班研究所，結下一生人个緣。為到在客家學院个寶庫裡背尋寶藏，二年學習个期間，𠊎毋識赴毋掣也係請假，𠊎照等客家諺語講：「早䟘三朝當一工、早䟘三年當一冬」。二年个學習期間，𠊎係日日噩夜，正有法度寫好超過十萬字个論文。從入學前个準備到畢業，因爭客家學院𠊎正會心懷客家，有機會對客家个語言同文化有深入个了解，乜感覺吾爸吾姆就在𠊎个身邊。
一个族群有語言正有文化。中央大學客家學院在職專班研究所畢業這幾年，𠊎一直同客家共下，𠊎在做客家薪傳个工作，從幼兒園、兒童到成人，這既經係𠊎下半生人个志業了。經過客家學院研究所个磨練，𠊎時時創新挑戰自家、同自家比賽、希望自家做得有「臺頂三五步、行盡天下路」个本事。

彭玉錢 聲檔 －𠊎个客家學院緣
〈𠊎个客家學院緣〉創作感想

得獎盡歡喜。雖然毋係打頭名，係第三名，這係好个開始，乜表示自家還愛煞猛打拼兜仔，在客家客字文學个園地繼續寫分佢熟絡來。

這擺做得得獎，愛講：「感恩、感謝」。感恩𠊎在天頂个阿爸同阿姆摎𠊎降出來，分𠊎有客家个ＤＮＡ。因爭盡思念佢等，故所，正會想愛認真來了解客家个語言同文化。

另一方面愛感謝客家學院，係客家學院分𠊎有一个安心學習个所在，也打開𠊎對客家政治、經濟、文化、產業…等等知識个大門。

▲BACK