山貓

【文／羅肇錦∕中央大學客家語文暨社會科學學系榮譽教授】

 

客話底肚，所有本地土長土生个東西就會加一个「山」字來稱呼，像山項野生个 葡萄藤，做得拿來煮雞湯係中藥材个一種，个就安到「山葡萄」，旦係毋好同外 來種，在樹梗打子个樹葡萄混雜著。另外，野生个山茼蒿安到「山蕒仔」，又安 到昭和草或者飛機菜，原在無人拿來做菜食，顛到一下當多人摘來炒酒炒麻油， 變成有名个野菜︒還有山肚个艾草安到「山艾仔」，山肚个羌仔安到「山羌」，山 肚个湖蜞安到「山湖蜞」，山肚个貓仔安到「山貓」。

「山貓」現下人安到石虎，佢個樣子就像細型个老虎故所安到石虎，又同一般鄉 下人在屋下畜來打老鼠个貓仔當共樣，故所鄉下人講佢係山貓。也就係近十過年， 台灣當受人注意，在三義火燄山附近一帶，輒常分車仔撞死个保育動物石虎，這 兜石虎在苗栗三義山區以前都安到山貓，這兜山貓常常也分人畜到屋下就變成家 貓，無特別講佢山貓，反正歇在山肚，無人飼養个安到山貓，歇到人屋下，有人 檢佢食个就係一般个貓仔。

記得還細時節，老鼠多，屋下一直就畜有兩三隻貓仔，當多貓仔食著透死个老鼠， 連自家也毒到消消，故所，當多人屋家貓仔畜到幾下隻，驚怕萬一無睹好。

記得涯還讀小學，當時有屋下有一隻貓仔畜到涯二十零歲，足足有十過年，老誒， 正自家走到山項匟起來，仰誒消忒也無人知。這隻貓仔盡知人性，見擺捉到老鼠 就會咬到大人面前，大人講分佢食佢正敢食，下把仔打著山兔仔比厥身體較大， 乜共樣拖轉來分吾母犀，犀來炒分大家食，佢就乖乖一聲就無喵。這隻貓仔不管 打到雕仔捉到狗麻蛇抑係兔仔老鼠，全部毋會自家偷食。故所其他个貓仔來來去 去緊換，就佢畜十過年正消忒，用貓仔个壽年來算係長命神貓，毋過當時無麼知 長命貓个難得，也無知這隻長命貓原來就係石虎，就係山貓，正會打兔仔轉來分 涯食。


羅肇錦教授 聲檔—山貓

▲BACK