無該手段，毋好打該飛鉈

【圖文∕彭欽清】

 

還細該下，下擺仔會有人到莊項來打拳頭賣膏藥。

有一擺，看着正一隻手个拳頭師傅使飛鉈，功夫盡好，愛打麼个就打到準準準，害我看到心寒膽顫。吾三哥好看傳仔，見多識廣，請教佢，佢講飛鉈使來好个，做得喊一儕人企在對面丈外仔，鼻篤項貼一細片仔紙，師傅丟出飛鉈，一黏啊着這片紙就掣倒轉去，鼻篤項个紙片黏在飛鉈項，該儕人全無唉哉。看𠊎聽到嘴擘擘仔，三哥問𠊎講：係喊你在該企等恬恬接飛鉈，你敢無？𠊎緊拂頭。

飛鉈係一種盡難練个中國武術兵器，聽講黃飛鴻使來盡到家，做得講係厥獨門功夫。鉈，係頭大尾尖个細鐵團仔，䌈在一條細索仔項，用單隻手來使，功夫有到家个，愛收愛放，愛打哪位，全取在佢，功夫係毋罅好，收轉來該下會傷着自家，故所敢學个人毋多。　

客英辭典有一句老古言語：「無該手段，毋好打該飛鉈」，羅馬拼音念起來係mau ge shiu ton, m hau da ge fui to，係大陸个河婆話，聽起來像四海話，轉到四縣腔係mo ge su ton, m ho da ge fi to。

一儕人學一種語言學來熟絡無，同生活經驗當有關係。聽過毋當看過，看過毋當試過。自家好在識看過人打飛鉈，又聽吾三哥講到有手有腳，正知麼个安到飛鉈，也正了解無該手段，毋好打該飛鉈這句諺語个意思。根據辭典个英文解釋係：技術無到家，毋好儘採出手同球仔擲出去，就係講莫去做自家無才調做个事情。恁樣解，無點出客話个另外一層意思，就係講勉強做个話，會傷着自家。用較粗俗个客話來講係，無該痢肚學人食麼个瀉藥。

諺語大體仔都係已有厥道理，日常生活盡用得着。無該手段，毋好打該飛鉈，又乜共樣。無論士農工商全部用得著，比論講有兜人看着股票好賺，全無準備就走去買當多，定著會了到喊毋敢。有兜人無去測自家个斤兩，就走去做官選舉，輒輒搣到頭烏面烏下台，頭路也無落無著，都係因爭無該手段，好打該飛鉈。　

看啊學術界，有幾多仔人為着名，為着利發表一大拖攞个論文，等到分人兜腳擗出來，毋係數據造假就係抄別人个，搣到愛撤職賠錢食官司，名聲打到壞壞。

係講佢這兜人有先學着無該手段，毋好打該飛鉈个道理，應該毋會恁淒慘正著。


彭欽清聲檔 － 無該手段，毋好打該飛鉈

▲BACK