有請彩券來翻譯客英辭典 彭欽清

【文∕彭欽清】

 

成十年前有一擺去開會，開歸日仔，食飽晝出去行行啊，順續仔買一張大樂透，轉到會場，有一個教授問𠊎當晝無尞，走去哪，𠊎應講：去買大樂透。佢續等問講：大樂豆？吂識食過，好食無？𠊎應講：買着就好食，買毋着就毋好食。聽到佢愕愕然。

這兩十年，盡多朋友就知𠊎興買彩券，毋過愛已知己个人正會知吾戇想係着大獎請一批人來翻譯客英辭典。

這本辭典做得講係吾个心肝命袋，尤其係買着1905年个初版同1926年个修訂版原本過後，歸日仔揇等來緊看緊做筆記。辭典个初版印出來該下還係清朝，修訂本係在民國政府時代出版。

這兩个版本都有千過頁，有潮州府，惠州府同嘉應州个客話，也有多少仔閩西客話，內容包羅萬象，做得講係客家文化个寶山，係煞猛去挖，挖得着盡多寶。比論講，“飯”做得講fan過pon，pon係潮州客話。“聽”白讀tang，文讀tin，潮州客話發ten，嘉應州客話，惠州客話聲調無共樣。

這兩本書个編者都有尋當地个人𢯭收集記錄，故所留下來當多盡口語个話語， 這兜話語在臺灣還已輒聽得着。這兩本辭典乜記錄下來盡多个狀聲詞同語氣詞，像講人好嘵係gau gau gau gau 同 nung nung nung nung。 ng ng, 係兜屎該下同嬰兒仔講个。o o,係拐細人仔睡目出个聲；用手拿等東西飼細人仔食會講am；同細人仔搞生趣會用着jia个聲;鼻公癢會打ad qiu;餵豬仔食該下會出on on个聲喊豬仔來食，喊雞仔來食會用zu zu。

盡特別个兩個語氣詞值得提出來分大家參考，第一個係ga，照辭典列出來个例仔同英文解析來胚想，應該係“該恁仰”三隻字，講來遽又牽下聲，聽起來就ga，比將講“該（恁仰）就難”，日常生活已會用着。 第二個係gia，英文解析講係聽起來當粗俗又得人惱个大聲話，胚想係了少話“厥姆佢正好”五隻字講遽過又牽聲个音，有人一開嘴就會講這句話，就會分人過嘴講“歸日仔gia gia 滾 ”。

除忒頂項講着个，辭典還有記錄當多其他文化个東西，像風俗，老古言語這兜，正經係客家文化个百科全書。看等百零年前外國傳教士同客人挖出來恁好个寶，自家客人嗄同佢看做草，無論係學術界抑係公家單位無幾多儕會去體恤，情願拿錢去打水漂仔，毋係去辦花花假假个活動，就係去做有無都做得个研究抑研討會，樣相有做出來就好，管佢麼个品質毋品質。

兩個蘇格蘭長老教會牧師飄洋過海，前前後後用忒兩三十年，恁煞猛恁艱辛收集記錄下來个客家文化語言寶庫，到這下嗄分人放在脣項做佢閒，無幾多儕認真去看佢。見想着這點，就試着盡毋盼得，代佢這兜毋甘願，正會想湊兜人摎佢翻譯出來傳下去，自家無才調，就買彩券來賭造化。

大樂透好食抑毋好食，愛看會着抑毋會着，確實有影。


彭欽清聲檔 － 有請彩券來翻譯客英辭典

▲BACK