屋門口个串仔花開矣

【文∕張捷明∕國立中央大學客家語文暨社會科學學系在職專班碩二生】

 

串仔花開矣，開到樖麻嚌嗟(po´maˇji ia)靚到奈毋得，看著个人都說還靚。串仔花聽毋識人个誐腦，單淨煞猛个依循佢个基因排列，配合天時變化，花開花謝發芽結果。

（華語釋義）家門口的瀑布蘭開了，堪稱花團錦簇、美不勝收，看到的人都說漂
亮。瀑布蘭不識人間讚美，只是努力的依循其基因安排，配合天候變化，花開
花謝、發芽結果。

串仔花煞猛打拚，路唇个圓仔花，也一大片一大片用共樣个煞猛，共樣開到樖麻嚌嗟，靚到奈毋得，毋過淨得著「圓仔花毋知媸」一句評語。圓仔花乜毋識人間誐腦訄誚，單淨煞猛个依循佢个基因排列，配合天時變化，花開花謝、發芽結果。

（華語釋義）瀑布蘭努力不懈兢兢業業，路邊的圓仔花，也一大片一大片以同等
的努力，同樣開得花枝招展、生意盎然，不過只得到「圓仔花不知醜」一句評
語。圓仔花不識人間褒貶，只是努力的依循其基因安排，配合天候變化，花開
花謝、發芽結果。

屋門口个串仔花開矣，路邊个圓仔花也開矣，年復一年全無停歇，適開滿圓仔花个路唇，有一隻細狗仔，圍等狗阿姆捩捩轉問講：「圓仔花花開花謝無了時為著麼个？」狗阿姆停下來，伸出舌嬷舐一下細狗仔个頭顱，惜入心个講：「佢在該等開花結果，愛將厥姆留分佢个美麗負責傳分下一代啊」。

（華語釋義）家門口的瀑布蘭開了，路邊的圓仔花也開了，年復一年永不止息，
在長滿圓仔花的路邊，有一隻小狗追著狗媽媽打轉，在問說：「圓仔花花開花謝
沒完沒了所謂何來？」狗媽媽停下來，伸出舌頭舔一下小狗的頭，無限愛意的說：
「她在等開花結果，要把她媽媽留給她的美麗負責傳給下一代啊！」

有一個細人仔拿等一枝枝仔糖，摎厥姆跈到該細狗仔後尾行，細人仔問厥姆講：「細狗仔歸日捩捩轉無時閒，係為著麼个？」厥姆笑瞇瞇仔摸一下細人仔个頭顱應講：「佢在該鍛練佢个體能，佢在該摎厥姆學習智慧，好預備做狗阿爸狗阿姆啊」。

（華語釋義）有一個小孩拿著一枝棒棒糖，和他媽媽跟在那小狗後頭走，小孩問
他媽媽：「小狗整天打轉沒半刻閒，為了什麼？」她媽媽笑一笑，摸摸小孩的頭
回答：「她在鍛練他的體能，他在跟他媽媽學習智慧，好預備當狗爸爸狗媽媽」。

屋門口个串仔花開矣，路邊个圓仔花也開矣，細狗仔像知像毋知个「汪汪」兩聲，續等捩圓圈仔。細人仔舐一下枝仔糖，又同厥姆講：「分汝舐一口，當甜呢」。

（華語釋義）家門口的瀑布蘭開了，路邊的圓仔花也開了，小狗似懂非懂「汪汪」
兩聲，繼續繞圈子，小孩舔一下棒棒糖又對媽媽說：「讓妳舔一口，好甜呢！」

屋門口个串仔花開矣，還靚。路唇个圓仔花乜開矣，共樣還靚。

（華語釋義）家門口的瀑布蘭開了，好美。路邊的圓仔花也開了，一樣好美。
（本文以苗栗四縣腔寫成）

張捷明 聲檔—屋門口个串仔花開矣

▲BACK