跌三烏

【文／羅肇錦∕中央大學客家語文暨社會科學學系榮譽教授】

 

舊曆年个十二月二十五，按到入年架，做閒事个人，開始轉年，大大細細行兼來，準備過春節，也就係轉來過年。過年，除忒大家有澎沛好食以外，細人仔還有矺年錢好分，大人呢？盡主要个係有繳好賭。年三十暗晡開始，看天時決定，到月半前，係講落雨又寒又冷，做事毋得，有兜好賭个人，隨時做得湊腳來賭。

頭擺盡多人賭个係「跌三烏」同「揭磚仔」。

「跌三烏」係用三只絭空錢（像乾隆通寶、嘉慶通寶這兜古銅錢仔），拿來挼到薄薄仔，一面無字就安到「烏」，另一面有字就安到「牸」。三只有字該面顯開來，無字个面覆等，共下平平放在手巴掌，用自家个機巧用力將銅錢跌到平石頭上。係講三只都翻面就係三烏，臨到跌三烏該人總贏，大家都愛繳錢，係講三只都無翻就係三牸，臨到跌三烏該人總輸，愛賠錢分大家。係講有烏又有牸，該就無輸無贏，大家和。

跌三烏，越多人看越旺，喔喔喊喊，三烏啊！三烏啊！緊喊緊搭腳臂，喊衰个人就煞猛喊三牸啊！三牸啊！喊來喊去，運氣好个連連三烏。三烏一擺安到「一斗」，三烏兩擺安到「兩斗」，盡好彩个係三到三烏安到「三斗」，跌得著三斗个人，差毋多該日仔定著贏繳，贏繳個人，暢起來就會請看賭繳個人「食紅」。

另外愛記得个係，跌三烏大部分係禾埕項放一粒平平个大石頭，愛賭个人、看賭鬥鬧熱个人、抑係插花仔个人，全部圍圍就來，正鬧熱，正生趣，腳臂都搭痛搭腫了，錢也輸忒仔乜甘願。這就係跌三烏个特色，也係跌三烏生趣个所在，輒常賭來賭去續落起雨來，大家搞到起磅，無就毋貪輸贏架下，落雨乜還愛繼續賭。（本文以四縣腔寫成）


羅肇錦教授 聲檔—跌三烏

▲BACK