拈禾串

【文／羅肇錦∕中央大學客家語文暨社會科學學系榮譽教授】

 

電子報通知崖，講二月開始，愛負責一个專欄，用客話寫客家个特別詞彙，尤其強強會分人添放忒个特殊詞，藉這个專欄來做整理摎錄音，留分後生人學起來用，恁樣客話正有辦法隨講隨接流傳豐富。

該恁仔崖又愛尋一个的當个專欄名稱正做得，賭賭過年邊仔，較有時間，愐來愐去，正想起舊年在新雞隆看人用機器割禾，跌忒个禾串無人拈，實在打爽。想起還細時節，大人用戽桶打穀（吂有戽桶就用拌篁）細人仔就跈在屎背尾拈跌在田項个禾串，拈著一串就暢到耐毋得，遽遽拈起來繼續緊跈緊拈。差毋多拈有一手抓就拿去田脣放好，等轉晝邊仔歸坵田个禾仔割好，禾串正集集秋來，拿轉去分雞仔食。

禾串係耕田人辛辛苦苦蒔田挲草挷稗仔掖肥料，所得到个成果，係耕田人个寶貝。共樣個道理，客家話詞彙係客家祖先創造使用流傳下來个文化精華，係客家人個寶貝。禾串恁寶貝，連耕田人个細人仔，就知愛拈起來，無好打爽，該客家文化精華个客家特有詞彙，還較愛拈起來，洗洗淨阿咧，排共下，正留分大家來好好傳承學習。

故所這个專欄按到「拈禾串」，就係要尋轉強強會分人添放忒个特殊詞，好好分條解析，同客家話肚項，像跌忒个禾串，無麼人知，但係當有內涵又盡有意義个詞彙，陸續整理出來。（本文以四縣腔寫成）


羅肇錦教授 聲檔—拈禾串

▲BACK