三十暗晡

【文∕張瑞玲∕台中市東勢國小老師】

 

打拚歸半生人，這下年過半百咧，顛倒嗄來懷念細漢該滿過節个情景，尤其係三十該日，歸家人無閒濟借个情景。

細漢時節，屋家毋係真豐湧，平常个日斯儘採食，打幫過年過節，正有食較豐沛。往語講：「年三十个飯甑—無閒」。記得以前對年三十下晝開始，灶下斯不時傳來洗洗切切个聲，一盤一盤个雞盤、脢條肉同魷魚絲，放在灶頭項，瓦斯爐上背還有一鑊一鑊、滾著香馞馞个炆爌肉、長年菜同炆筍干。吾這兜細人企在灶下門口看去口涎水搭搭跌，胲摟摟期待暗夜遽遽來到。

該日，吾等兄弟姊妹特別落力拚掃、貼春聯，做都恁拚勢，斯係為著暗夜个團圓飯。無閒歸日，總算分吾等等著咧。哇！阿姆款歸桌淰淰个菜，有鴨血炒韭菜、木米炒黃梨、排骨菜頭湯，逐路菜做下都係𠊎愛食个。

阿姆个老手藝，表現在豐豐沛沛个歸桌頂，色、香、味總下兼顧著，實在斯無簡單，毋單淨恁泥，大家緊食緊講好話，像食長年菜希望長長久久，食筍干使得升官賺大錢，食芹菜愛逐個人勤勤儉儉。細細个桌面斯有先民大大个智慧，肚飽心飽，𠊎已滿足咧！看著大家圍偎共下，互相鼓勵、感恩，該種幸福、快樂个感覺，毋知愛仰脣講分若等聽。

食飽夜，收揫好，重頭戲開棚咧，世大人分矺年錢，拿著紅包，遽遽同紅包矺在枕頭下，新衫新鞋換上身展分大家看，大人在廳下有講有笑，實在真鬧熱！無幾久，並另蹦弄个紙炮聲響無停，啊！年三十暗晡，𠊎愛同𠊎盡驚个紙炮聲共下掌夜掌天光咧！

到這下，兄弟姊妹隨人討个討、嫁个嫁，逐年年三十暗晡既經無頭擺恁鬧熱咧。像吾屋家，來去斯四個人，團圓飯係對外背買轉來食較多，雖然萋亍，毋過像往擺在灶下無閒濟借鬧熱个情景也斷影咧。食飽夜，各人做各人个事，想想也實在斯真孤栖。

恁堵好，前兩日阿哥打電話來，佢也有恁泥个想法，斯湊𠊎明年共下過年，𠊎想都無想斯應佢好，順續湊戴在花蓮个老弟同老弟嫂、嫁去苗栗个老妹、老妹婿共下來。哇！明年過年斯鬧熱囉！老阿姆歇睏毋使無閒咧，換吾這兜當年胲摟摟等食个細孲嗶款來食咧！雖然吂到年三十，毋過，細漢該滿快樂溫暖个感覺，分𠊎尋倒轉來咧！（本文以大埔腔寫成）

張瑞玲 聲檔— 三十暗晡

▲BACK