阿狗哥个倈仔

【文∕張捷明∕國立中央大學客家語文暨社會科學學系在職專班碩二生】

 

在油桐花森林小鎮摎人掌屋个阿狗哥，生來車鎚武頓，一雙手骨神茶杯恁粗，比桌腳還較拄固，牛就強強會無恁紮。毋過，今佢老矣愛退休矣，人講「積穀防飢，養兒替老」，佢喊厥倈仔「阿細狗」接厥事，自家講愛轉去渡孫仔。

阿細狗生來斯文秀氣，薑筋薑筋，兩支腳骨強強會比香芯骨還較幼，連老鼠仔就毋驚佢。

佢上班第一日，看著主人擐等一桶汁愛餵豬仔，汁桶倒入豬竇，豬仔相賽搶食，食飽就睡目，毋使做事，逐隻就肥固固仔。

阿細狗日日看，佢心肝想:「𠊎身上無該三兩肉，摎人掌屋會分人笑。𠊎一定愛學阿豬伯，煞猛食畀長肉，莫分人看衰」。

阿細狗學阿豬伯，睡到大門口，開始煞猛食，盡撐，連主人轉屋，都毋盼得亢起來吠兩下迎接，驚講消耗體力，會無采佢盡推。

過了三隻月，瘦夾夾个阿細狗，變著圓lud`lud`仔，看起來當拄固个樣仔。

這日，一個賊牯斡到門背過，想愛偷東西，無堵好踢橫一支掃把「砰」一聲，阿細狗一聽，心肝罵講：「還愛得，太歲頭上動土，也無去打探一下𠊎係麼儕」。 「養兵千日，用在一朝』，阿細狗跋啊亢起，「汪汪汪』大大聲吠，兩支前腳向前躍，兩支後腳盡力牯一箭，起腳愛逐。

該賊牯一聽有狗吠，心肝暗想：「壞蹄咧！」對等柵仔門跋腳就瀉。

阿細狗一看著賊牯愛瀉，奈有放佢束，佢跈等踏出第二步腳，佢心肚講：「走奈位去，𠊎毋使三步腳，汝就好勢」。

賊牯既經走出柵仔門，走到無蹤無影，阿細狗淨吠，還係無逐上去。

原來阿細狗平常淨食、淨睡、無運動，忒肥，一躍就跌倒，再躍腳又撓著，橫著地泥下毋會震動，好得還知好吠。

主人聽著阿細狗吠到大細聲，胚講有賊牯來，擎起棍牯遽遽走出門外背看，續看著阿細狗个狼狽樣，就適該道嘆講：「唉！豬毋肥，肥著狗。」

阿狗哥聽著消息也趕轉來關心，看著阿細狗肥到毋像(cam)樣，就講阿細狗：「唉！戇牯，仰恁戇，老古句有講：豬撐大，狗撐壞，人撐矣變精怪，下二擺愛記得喔！」

阿細狗知差，頭犁犁，縮恬，毋敢聲。下後，阿細狗煞猛運動，無幾久就同厥爸共樣，變做一隻盡慶盡厲害个大狗牯矣。（本文以四縣腔寫成）


張捷明 聲檔—阿狗哥个倈仔

▲BACK