得人惱

【文∕張捷明∕國立中央大學客家語文暨社會科學學系在職專班碩一生】

 

阿明五歲，今年正招老妹，大家都當歡喜，細老妹四只月收涎該日，大人㓾雞捋鴨、舂粢打粄、無閒直掣，無人唉乃阿明，阿明就坐到門檻上打鼕屈，自家大大聲緊講：「細老妹盡得人惱，害大家無惜涯」，佢挑挑愛講分大人聽个。

阿姆聽著，知講頭擺大家惜佢一儕，加一個細老妹了後，細人仔還毋慣，適該做嬌得似，這央時个大人一定愛多嬌惹佢一下，就跍下去低言細語个同阿明講：「阿明盡乖盡得人惜，做阿哥囉，細老妹當愛阿哥拐呢！汝去摎細老妹打盎咕，等下姐公姐婆會帶等路來，看汝做阿哥恁慶，一定會阿𧩣汝，還會分加兩只糖仔分汝喔！」阿明聽著正歡歡喜喜去同細老妹做伴。

臨晝仔，姐公姐婆阿舅阿姨，擐等等路還帶等𠖄衫背帶來，愛送分妹仔揹孫仔，講做得一代傳一代。

阿公阿婆看著親家且姆來到，遽遽帶等大家出去迎接，阿姆攬等細老妹愛分大家看，阿姨阿舅圍兼來講：「盎咕～，阿姨惜，還得人惜還靚喔！」又用手輕輕仔拈一下細老妹个嘴角，又同細老妹打盎咕，阿公阿婆看著當歡喜。

姐公姐婆也偎兼來，伸手去攬細老妹大大聲講：「唔～！還～得人惱、還～媸喲～！」還牽聲牽到長ˊ~長ˇ長ˇ~，阿公阿婆聽著還較歡喜。

阿明企到唇口聽著，嘴嘟嘟仔講：「大人盡得人惱，涯講細老妹得人惱就做毋得，姐公姐婆講細老妹得人惱，大家顛倒恁歡喜。」大家聽著，謔到費毋直。阿姆跍下來教阿明講：「頭擺人無醫院，愛蓄細人仔大無恁該，迷信細人仔媸媸較會大，較毋會分巫婆看中意帶走，故所愛挑挑大大聲講：『恁媸恁得人惱』，意思係講分門背偷聽个巫婆聽个，也就係講：祝福細人仔乖乖會大，食到百二歲啦！」

阿明講：「喔！涯知咧！」講煞，就行到姐公姐婆个頭前大大聲講：「姐公姐婆還得人惱哦，阿公阿婆還媸哦！」阿爸阿姆聽著呆一下，煞煞拉阿明講：「細人仔仰無大無細呢？」阿明就應講：「涯愛分阿公阿婆、還有姐公姐婆乖乖會大，食到百二歲啦！」

姐公姐婆聽著就講：「阿明个頭顱會分涯惜光喔！」（本文以四縣腔寫成）

張捷明 聲檔—得人惱

▲BACK