行嫁之日

【文圖∕彭碧珠∕華語老師】

 

榜生摎碧珠係在日商公司上班時熟識个，兩儕交往一年後，在民國67年初，經由雙方主婚者，還過親友个祝福，圓滿結婚囉！

講起結婚該日，有影異特別！因為麼係榜生个生日，所以佢自稱自家非常幸運，得著一份最值得佢「珍愛一生个大禮」！佢深情真意个對碧珠講：「妳放心！涯一定會煞猛打拼,畀妳過好日仔。」

新娘車駛啊出巷口無極遠仔，就係前駁仔堵正通車个「中山高速公路」。車隊一蹶上交流道就加速前進。榜生牽等碧珠个手，坐著愛兼又愛兼。碧珠臆起這條快速道路，就像係為著自家行嫁之日挑工鋪个。敢毋係吶？恁多餘年來啊！好天時，愛受盡漫天灰塵；落水天，就愛忍等該滿地个湳泥漿，到如今，總算做得換來一路个開陽摎舒爽囉！不知不覺中，碧珠續感動著目珠眶濕濕，心內乜陣打陣仔湧起濃濃个感恩之情來。

在又靚又闊个路上，碧珠愐起爺娘个養育之恩，爺哀該種千捨毋去，萬捨不得个神情，又一一二二浮現在眼前⋯。佢想著媽媽昨暗晡个三叮嚀四囑咐；又想起爸爸分佢該疊賁篤篤个「紮腰錢」時个祝福：「將這兜錢帶過去緊發緊多⋯⋯賺千萬，賺億萬，賺來買田、買大樓。爸爸祝福妳摎榜生雙竹透尾，平安富貴，賺大錢」；碧珠又想著未來愛摎姐嫂仔、姐姑仔相處，愛奉待家娘、有孝家娘个事情上⋯，佢愁喜複雜个心緒又加盛心焦，想啊想仔，當下目汁沱流，任挲都挲毋開，該千樣百樣个期待，全全在腦海中揙上不揙下。

佇田頭等吉時入門該下仔，榜生摎碧珠講：「這看出去个田全係自家个；離這無幾遠仔有礱間，還過倉庫，該位就係妳日後上班个地方；這邊一大片五虎下山式个老夥房，就係恩俚開展新生活个起點，妳看！該兜歡喜靂天，追逐新娘車个姪兒輩，隻隻麼係涯背大、惜大个喔！」

車隊在禾埕停啊好勢，新娘吉時下轎个炮仔聲響嚕！照禮規，新娘愛分好命个大嫂牽入廳堂，好得該日个寒風盡知人重輕，吹著人並無盡冷，佢和和仔吹等新人身上白皙皙个婚紗，乜輕輕仔掠過新親戚面上个笑容。冬下時个日頭，晿著大家都係燒暖个、歡暢个，尤其四門六親該四句落落个好金言、祝福聲，就像添分新人酒杯肚个酒共樣，越添就越多⋯。

    調皮个老弟，一向就係爸爸媽媽个開心果。今晡日，他仍然係挶著該丑丑仔，用該走走跳跳喜感十足个動作，硬硬摎容易感傷个媽媽鬧著心肝哇開哩！

食晝後，新娘間𨀣𨀣一大群「鬧新房」个親戚。新人兩儕都異堅持，無論人仰般撩弄，毋就係毋，毋分該兜後生條仔搣煞。包尾，新娘發分大家一儕一隻細紅包仔求饒，這兜鬧場个「觀眾」正漸漸仔散去。

輪著新人出門來送客个時節，大家都知「新婚日，無講"正來尞"」个。新人用握手來送別親愛个家人，共下上班个同事；還過頭擺讀書時節个細妹仔伴…。

榜生看著送嫁个車隊漸漸仔駛遠，正湊碧珠共下落屋肚去。碧珠暗暗仔對自家講：「妳愛堅強！勇敢去迎接全新个人生；愛摎最心愛个人共造幸福美滿个家庭。」（本文以海陸腔寫成）

編者按：上圖是本文作者彭碧珠老師，桃園新屋人，1994年初移民南非，現職為高中華語教師，曾任南部非洲客屬聯誼會顧問，曾榮獲僑委會2014年度海外華語文遠距師資培訓班第一名結業。

行嫁之日个錄影，攝於1978-02-29

彭碧珠 聲檔—行嫁之日

▲BACK