擐燈籠个火燄蟲

【文∕張捷明∕國立中央大學客家語文暨社會科學學系在職專班碩一生】

 

正月十五鬧花燈，火燄蟲無閒直掣打扮到靚~靚靚~，暗晡夜佢愛去桐花森林，參加一年一擺个燈籠比賽。火燄蟲手路盡慶，做个燈籠隻隻都恁靚，年年比賽，佢係謙讓座第二，定著無人敢講自家打頭名。

    紅紅个日頭落西山，天色漸漸暗，天邊五色雲，適火燄蟲个心中，畫出一幅靚靚个畫。佢看等手中該隻細燈籠，想著天較靚也會變暗夜，佢起一隻大願，下二擺定著愛做一隻遮天个大燈籠，分大家一暗晡就做得看靚。

    火燄蟲擐等細燈籠開始出發，佢愛飛過魚塘、飛過草排、飛過河壩。路項堵著魚仔，魚仔當欣羨：又堵著虐毛蟲，虐毛蟲忍毋歇讚嘆。來到河壩唇，河壩水哩哩囉囉，石跳仔彎彎斡斡，暗夜中看著阿狗哥揹等厥倈仔，講倈仔發燒毋退，透夜愛去醫生館看先生。

    毋過，頭前路恁暗，腳下水危險，愛一步一步細義𨃰，係無，跌落水肚命會冷。火燄蟲想起厥公个話：「濟人須濟急時無。」故所，佢無下二句，擐等細燈籠就飛到頭前帶路行，照亮一步一跳个石跳仔，分阿狗哥細心細義安全過河壩。

    等來到比賽个油桐花森林，花燈既經比賽忒，火燄蟲看著靚靚个細燈籠失去得獎个機會，試著當打爽。

    毋過，佢又想起厥公个話：「世界當大當闊，愛大家都恁慶正生趣。」故所，佢看著今年第一名个花燈，共樣乜恁靚。

    遮天燈籠可能無人做得著，照三吋闊个細燈籠只愛有愛心，共樣恁光明恁靚。（本文以四縣腔寫成）

張捷明 聲檔—擐燈籠个火燄蟲

▲BACK