中原到客家

【文／羅肇錦∕中央大學客家語文暨社會科學學系榮譽教授】

 

三十五年，半隻人生。
這半隻人生：
前半係中原，後半係客家；
前半係雜誌，後半係週刊。
中原時代，唔使愁客家話介失落，殺忙說政府、膨中原，
客家時代，強強會聽唔到客家話，愛辦活動、愛行街頭，
這唔係風水輪流轉，
也唔係客人無才調，
這係麼介？係麼介---
這係恩這代介人「前世無修」：
前世無修，故所愛一日到夜喊人講客話，
前世無修，故所愛週週刊出搶救介文章，
前世無修，故所愛搣到--阿公講國語，孫仔耳背背，
前世無修，故所愛搣到--學校教客話，屋下講官話，
前世無修喔，前世，無修，賴仔捉來做心舅，
前世無修喔，前世，無修，愛炒雞肉無麻油，
做麼介會前世無修？做麼介---
大家知--電視，害人精。
你盡知--教育，無正常。
崖也知--社會，不民主。
還有盡死無命介係--客人自家罵唔會走醒。
歸日聽人鴨母喙，總愛有錢袋，
歸日驚人比崖卡會，唔知樣搬出菜，


三十五歲，半隻人生。
這半隻人生：
前半生戇戇兮，後半生逼逼跳；
前半生食蕃薯，後半生緊打屁。
還小時節，唔使愁政治社會文化，殺忙學寫字、讀課本，
半老時節，強強會尋無時間睡目，愛看電視、愛譴節目，
這唔係客家無節目，
也唔係客家無人才，
這係麼介？係麼介---
這係恩這代介人「前世無修」：
前世無修，故所無曉得殺力爭取時段，
前世無修，故所無知得大家團結合作，
前世無修，故所愛搣到--各立山頭，殺忙挖空頭，
前世無修，故所愛搣到--各扶各黨，眼中無客家，
前世無修喔，前世，無修，賴仔捉來做心舅，
前世無修喔，前世，無修，愛炒雞肉無麻油，
做麼介會前世無修？做麼介---
因為--
長輩，無能力。
政府，無誠意。
資源，無分配。
還有盡死無命介係--客人自家講唔會分漿。
歸日學人河洛話，總愛有錢花，
歸日騰人北京語，唔肯講客話。

▲BACK