「母語教學」愛教音標無？

【文圖∕周碩興∕新客家廣播電台節目主持人】

 

母語，係哀仔摎嬰兒仔出世開始交談个語言，佢係盡自然个由親代傳分子代个溝通工具，這下摎佢排落學校課程肚，係高不已將个，請各位學校个校長重視這門課程，佢毋會影響英文摎國文个學習，因為任何一種語言都有共通之處，比論英文个「name」斯係客語海陸腔發音「淰」个聲調，斯代表个意思無共樣定定。

    如今吵著像雷公恁響个「語言平等法」，也毋係愛學生仔學習台灣十幾種个方言，斯係每一个族群个語言愛受著尊重，台灣係一个移民社會，從西班牙人、荷蘭人、鄭成功帶來大量漢人、滿清戰敗後个日本人，到國民政府徙到台灣來，台灣分異族統治下，並無自家个主體文化，乜因為恁樣，台灣个文化應該有更多樣性摎包容性，佢毋單淨傳承中華民族五千年个文化，也融入西方文化，毋係兼併係包容，毋係唯我獨尊个沙文主義，顛倒係互相尊重个完美主義。

    母語教學係毋係愛教音標諾？在這提出個人个淺見。原本母語个學習，係爺哀口耳相傳个，嬰兒仔從細到大佇屋下聽大人細子所交談語言之下自然就學會咧！可惜盡不幸个係，這下中國話普遍使用下，母語已經無辦法由爺哀傳分細人咧！

    更可悲个係細人仔摎佢佇學校所學中國話顛倒影響到爺哀身項，反轉來影響爺哀摎細人仔交談个語言，當今客語盡像外來語，學習客語像學習外國語言，假使恁樣，斯愛一套音標系統，正做得分細人仔借由拼音練習摎拼音个方式認識母語。

    另外一方面，就係當多客家字到目前為止，無人去查證摎考究，師出多門非常亂無統一，係講能藉由拼音先保留其「語音」，等考究摎查證後正確定「字形」，可能係一種過渡个做法，就以上來講，涯認為教音標有其必要。

   係恁樣音標系統式樣恁多，又愛用奈種較好諾？涯認為斯愛有系統个介紹摎整理，又做得摎客語發音清楚表達，斯愛選自家最熟又容易分人了解斯好。換句話講，以一種為藍本，舞熟後再參考其他个發音系統，再由自家个組合能力有系統个重組（recombined），不斷練習斯做得。

    以涯佇湖口國小採用通用拼音教學來講，其實這兜學生仔三分之一有學過英文，再加上注音符號互通後，其實接受度還做得，當然以三年生以後來教係不錯个切入點，也提供毋係客語族群，認識客語个機會。

    語言个學習不外係聽（hearing）、講（speaking）、讀（reading）、寫（writing），一遍又一遍个重複練習，毋過愛這樣做需要家長个配合，假使斯靠學校一禮拜一節四十分鐘个課程，轉屋下無良好个學習環境摎互相對話練習，效果盡難展現出來。

    母語教學愛有成果，需要校長、家長、學生仔、先生共同配合，校長愛堅持開這門課程，家長愛營造摎督促細人仔學習个環境，學生仔愛歡喜學習，先生愛有系統去引導學生仔个學習方法。

    當初實行國語教學時，小學排六節課，一直到大學還要上國文選，加上所有个媒體全部用國語發音，經過五十零年个教育，最後中國話變成主流語言，台灣河洛話變成商用語言，其他族群語言分佢邊緣化，無法度恢復咧！

係客家話將將會末忒麼？這一禮拜一節个課程，在全球化个過程中，主事者若是以英文課程優先母語課程个夾殺之下，還有極多生存空間諾？反正毋會講客家話也毋會餓死嘛，涯逐擺想到這，為客家文化个落寞流下無奈个目汁。
（本文以饒平腔寫成）

編者按：上圖是周碩興老師，藝名：阿亮，現任新客家廣播電台「阿亮个雜貨店」節目主持人，同時也是客語薪傳師，在新竹縣精華國中教客語。周碩興多年來除擔任客家委員會客語初級、中高級認證饒平腔評審委員暨召集人之外，更在各地客語演說及客語講古笑科比賽過關斬將，拿冠軍如同家常便飯，最近的佳績是榮獲2015年全國饒平客家語演說比賽第一名。

周碩興 聲檔—「母語教學」愛教音標無？

▲BACK