涯最歡喜全家講客語

【文圖∕邱碧蓮∕新竹縣饒平客家文化協會總幹事】

 

回想從103年通過客語(海陸腔)中高級考試認證通過，大家就問涯：考這愛做麼介？加入客家母語个教學，到今已經第三年咧！從一開始大家用疑狐䀴（注1）鬧熱个心態，到這下大家斯對涯擎手指公。

    這三年一路行來盡艱苦難行，從無人支持到歸屋下人都感著這係一件當有意義摎當光榮个事情，講起來實在當見笑歹勢，涯自家屋下个兩個細子續毋麼介曉得講客，講來也做毋得怪佢兜，從細斯無慣勢講加上無講个環境。

    涯本身係饒平妹仔，嫁變四縣心臼，又在竹東食頭路，所以摎竹東該兜同事講海陸，爺哀一個講饒平，一個講四縣，所以將就講華語，大个妹仔讀書時節，學校吂有客家教母語，所以佢一句斯毋曉講，細倈仔讀書該時學校已經有教客家母語咧，所以佢多少會講幾句，毋過在新竹地區大部分客語先生係講海陸腔，所以倈仔講个客係海陸腔，毋過兩個細人仔，讀書之前識在姐媽(麻)屋下戴過，饒平大體會聽，多少會講兜仔，尤其係喊：阿媽(麻)，喊著當正，轉湖口家娘屋下就喊：阿婆。細人仔佢兜自家會分：這係阿媽(麻)講个客，同阿婆講个客有一息息無共樣。所以，學語言愛從細學。

    這幾年屋下人慢慢有分涯影響到，前年妹仔摎涯講: 阿姆涯映妳恁認真做客語教學頭路，涯乜愛去考客語中高級認證考試，恩俚共下做客語傳承个頭路。聽著佢恁樣形講，心肝肚實在盡感動，還有分涯最感動个係，涯老公舊年年下乜報名參加客語中高級四縣腔認證考試，雖然包尾差四分通過中高級，有兜仔打爽，毋過，佢講：今年還愛去報名。這件事情毋單淨分涯當感動，也盡沙鼻、盡風神。

    作得為客語傳承盡一份心力，係涯對老祖公个交代，還有一份對客家文化个責任。本旦涯姆係當傳統个客家婦人家，總認為妹仔嫁人斯係外姓人，毋肯分涯䀴邱屋个族譜。

    這幾年來，做著當明顯感覺佢个轉變，佢喊老弟摎族譜提分涯研究，還摎涯海陸、四縣、饒平三腔中高級認證證書同薪傳師證書懸在廳下，見擺有人客也係鄰舍、親戚來屋下尞，佢斯盡沙鼻同人講: 涯碧蓮這下在學校教客語，今年涯考著交通大學个客家學院，轉妹家同阿姆講，本來涯還考慮愛去讀無？無想到阿姆講：考著斯去讀啊！做麼介毋讀？該係以前沒可能發生个事情，以前阿姆定著會講：恁多歲咧！還讀麼介書？

    教客語這三年，涯最感動也最歡喜个事情，毋係有麼介成就，係屋下人个支持摎認同，還有學校肚學生个一聲：先生好！靚靚先生好！

注1：䀴〔ngiang53〕，直視。玉篇‧目部：「䀴，直視。」廣韻‧上聲‧迥韻：「䀴，直視貌也。」

 

編者按：本文以饒平腔寫成，上圖是作者邱碧蓮在班上教小朋友說客語。邱碧蓮是客語薪傳師，同時任教於新竹市六家國小及桃園市新屋國小。
邱碧蓮不僅樂於教授客語，也是比賽的常勝軍，如：103年度擔任新屋國小戲劇社團指導老師，同年參加全國中小學客家藝文競賽北區初賽獲特優殊榮，全國賽第四名；參加104年度推動國民中小學本土教育本土語言補充教材、課文教案甄選比賽第二名等。
難能可貴的是，邱碧蓮不僅是語言類客語薪傳師，她今年還拿到戲劇類薪傳師的證書。

邱碧蓮 聲檔—涯最歡喜全家講客語

▲BACK