涯永遠心焦个故鄉~邦戛

【文圖∕謝可為∕印尼客家人，現任職日本IBM公司】

 

邦戛（注1）係一隻細埠頭（注2）在西加。講佢埠頭，佢也十分細，所以坐多（注3）人會試著邦戛係鄉下，毋係麼个大埠頭。

    邦戛个名有可能係從番譮（注4）「Pemangkat」來个。聽老人講因為往擺裏地方係海，後來慢慢填起來變陸地。番譮「Angkat」係「擎起」个意思，可能「Pemangkat」係代表「浮起」个意思。

    涯本身係1970年在裏隻（注5）埠頭出世。聽老人講，邦戛个歷史恁長，但係就係毋曉脫離番人（注6）。邦戛番人多，毋像山口洋，所以邦戛做生理，就做番人生理。涯爺嬡（注7）講番人生理最好做，係做唐人生理汝一定餓嘴（注8）。

    涯做細伙時，涯爸涯姆日日都毋閒愛去賺飯食。涯爸在中央巴析（注9）開雜貨店。店面前有人在樹下立棚開咖啡店。涯細細常打傷風流鼻膿。咖啡店个阿哥寮涯唱「鼻膿䬵，扡扡痎，咖啡牛奶半盅來」。涯也記得在裏咖啡店裏學折紙：折麒麟、折獅頭，今下想著還有陶。

涯个鄰居隔壁人也有廣府、潮州、福興人，但係咸盡人都講客譮。其實涯姐婆該析係潮州人，交來涯姐公个屋禁潮州譮，造成涯姆也毋曉講潮州譮，涯乜一樣毋曉講囉！根本，涯兜在屋下在外背都一樣講客譮。淨在學堂因為涯兜讀番書正用番譮，到下課涯兜就講客譮囉！成下分先生知到就頂痾金（注10）。在裏隻埠頭客家人搬落搬出，但係本地人到今日還一樣講客譮，保留客家人个生活習慣。

邦戛有老聖堂、奉教堂、基督教堂、回教堂、聖母娘、大伯公齊周。死佬會（注11）還有兩社，學堂也恁多，往擺涯從幼稚園到高中都讀「姑娘堂」（注12）。涯朋友也有讀政府學校，也有讀經濟專科。多少人還坐車去山口洋讀，邦戛讀出个後生人有幾下隻選擇：
1.本本邦戛跍
2.去古晉或者椰城讀大學
3.去外國作工。

    涯就選著去椰城讀大學，讀周（注13）乜佮人做工，做著無頭路試著，涯就去台灣尋經驗，台灣尋著个經驗日本也通用，今下就居留在日本十一年了。涯老婆係日本人，涯試著毋想涯个細伙大來咸盡變日本人，毋係日本人毋好。但因為涯係客家人，所以希望細伙也一樣保留裏个身分。唯一能證明自家客家人就係愛曉講客譮囉！涯乜盡命教佢兜講，涯老婆也會學著有一句兩句啦！

    到今日涯還心焦邦戛，算來涯心焦麼个？涯爺嬡也搬出椰城了，轉去也無屋好歇了，涯試著心焦（注14）个係記憶，舊老个記憶。在該學講譮、學唱歌；去遶街、去看戲、看撮把戲；上山打禾鷝（注15）、禾田捉𧊅、暗夜看火焰蟲；各式各樣个粄、个菜、个食物...。還有一年个節日、過年到清明、從天穿日到雪圓節（注16）。裏兜記憶，有鐳（注17）也無好買，死都還懷念。係涯裏出世，涯故鄉送涯个禮物，涯永遠心焦个邦戛。

編者按：上圖是本文作者謝可為的全家福，謝可為的發音是印尼的硬譮，譮即是「話」之意，所謂軟譮等於是台灣所講的四縣腔，其分界區在百富縣松柏港〈sungai pinyuh〉，往坤甸的方向講「軟譮」；往山口洋方向講「硬譮」，也就是相當於台灣的海陸腔。

注1：邦戛Pangkat – ngakuhiong，印尼‧西加里曼丹‧邦戛。
注2：埠頭pu1 theu2，城市。
注3：坐多cho3 to1，多數。
注4：番譮，fan1 boi1印尼話。
注5：裏隻 li2 cak5，這個。
注6：番人 fan1 nyin2，非唐人的印尼人。
注7：嬡 oi1，母親。
注8：餓嘴 ngo3 coi4，餓肚子。
注9：巴析 pa1 sak5市場。
注10：痾金o1 kim1，罰款。
注11：死佬會 si3 lo3 fui3，辦喪事个會，例：仁和社。
注12：姑娘堂 ku1 nyong2 thong2，學校名稱，是教會創辦的學校。番譮：Amkur姑娘是印尼人對天主教修女个敬語。這間Amkur學校係教會創辦，第一任校長可能係一个修女，學校又安到學堂，所以安名為姑娘堂。
注13：讀周 thuk6 chiu1，學業完成。
注14：心焦 sim1 ciau1，懷念。
注15：禾鷝 bo2 pit5，台灣客家所說的「禾鸅仔」。
注16：雪圓節 siat5 jan2 ciat5，冬至。

注17：鐳 lui1，錢幣。

謝可為 聲檔—涯永遠心焦个故鄉~邦戛

▲BACK