坐車

【文／羅肇錦∕中央大學客家語文暨社會科學學系榮譽教授】

 

等車
一分一秒，一畲兩畲，
緊等人緊多，逐畲个屎背尾就有人
上車
一畲兩畲，一站兩站
緊上緊多人，緊極緊多人上
尖車
像責蘿蔔乾，一皮皮个人強強會出水。
像釘電線頓，一支支釘在該毋會停動。
坐車
車肚个冷氣真好勢
後生搞手機 隻隻頭犁犁
老人督目睡 又乜頭犁犁
存到个目珠精精大家看大家。
下車
緊看緊煩 緊坐緊等人惱
阿姆哀仰還吂到 盡想遽遽下車
男人來女人去 老人上細人下，
坐車就像人生
吂上車个人 緊想愛上車
上到車肚个人 緊等愛下車



羅肇錦教授聲檔－ 坐車

▲BACK