最難忘也盡感動个事

【文圖∕張瑞玲∕台中市東勢國小老師】

 

在吾記憶个拖箱肚，分人感動个事，有真多既經毋記得了了咧。毋過，有一件事情，雖然經過十外年咧，還深深印在吾个心頭項。見擺想起來，心肝肚个感動，還親像昨晡正發生恁泥。

    吾姆係慈濟个委員，逐個月都愛收會員个愛心。大部份个會員，時間愛到進前，都會自動拿到屋家來繳。該日，正下班轉到屋家，車都還吂停好，阿姆斯在屋肚咻：「吂且！吂且！𠊎會毋赴咧！遽遽載𠊎來去收愛心！」心肝肚還在該疑狐：「啊毋係做下會自家拿來？哪個恁大牌？」想還想，車還係乖乖駛出來載阿姆出門去。
順阿姆指个路，來到東勢山項个旮旯角，一間犖确又舊陋个矮磚屋面前。心肝肚个疑問還過較多咧：「戴在這壁旯角！曾有功德款好收？係著也毋著？」腳步跈阿姆行入屋肚，接眼看著个係一間雖然無真闊，毋過拚掃著淨淨俐俐；細細間个灶下，裡背个盆頭鑊缽收著揫~揫揫。
可能係聽著聲說，對屋肚間項行出一個擎緊怙杖个老阿婆，接目看著這阿婆，心肝肚親像分電掣著。在暗摸胥疏个屋肚，看著一個背痀痀个身影，斟酌同佢看下，這個阿婆，怙杖擎緊、兩隻目珠竟然伸著目珠窟忒寧，係一個看毋著个青瞑阿婆。
聽著阿姆出聲喊佢，斯遽遽在衫袋肚摟啊摟，摟出三張壹仟箍个大票，講：「真歪勢喔！逐個月都愛麻煩你來同𠊎收。」兩個既經有歲數个阿婆斯坐在該狹狹个廳下，天南地北，對日頭正愛落山个臨暗邊直直講到斷烏咧正甘願煞。
轉屋家个路項，阿姆看出吾心肝肚个疑問，斯講：「這阿婆係功德會个照顧戶，自家戴在該山項，無老公、子女好照顧，本來愛安排佢去戴養老院，毋過佢堅持愛自家戴，無愛麻煩別儕。你看，雖然厥目珠無看著，毋過，不管係煮來食、洗衫、拚屋家做下做去素絲素絲。平常時，成半下林鄰會拿兜青菜、水果過來；無斯出外去拈兜資源回收，賣撇來相添生活瑣費。功德會逐個月補助佢三千箍个錢，大體都本本好好繳倒轉來。佢講：「𠊎好手好腳，自家賺斯有罅用咧！這兜錢係十方大德个愛心，有人比𠊎過較需要，拿去同別儕𢯭手好啦！」
聽到這位，想想現下个社會，好手好腳、好食懶做个人歸千擔，堵著事情斯怪天怨地，顛倒無這阿婆恁堅強，吾心肝肚緊愐想：「這個青瞑个老阿婆，雖然厥目珠看毋著日頭照亮大地个自然光明，毋過，厥个心肝肚係光明又燒暖。佢同心肝肚个光明，變作關懷世界眾生个心燈，照亮大家个心靈，這實在分人感動又溫暖啊！」
（編者按：本文以大埔腔寫成，上圖即是作者張瑞玲老師，她對大埔腔客語的傳承及推廣，貢獻良多，曾協助編輯台中縣本土語言教材，曾獲台中縣政府舉辦的鄉土語文競賽教師組客語寫作第一名、教育部舉辦的全國語文競賽客語字音字形教師組第一名。）

最難忘也盡感動个事—張瑞玲聲檔

▲BACK