台灣燈會一日志工

 

【文∕羅必鉦∕國立中央大學客家語文碩士班研三生】

 

今年台灣燈會從 2 月 22 日開始在青埔高鐵站前舉辦猴年花燈展，歸下 14 日，電視、報紙逐日廣告，鬧熱開棚，桃園市客家事務局邀請客家社團參加服務台志工服務个生事，服務台愛有客語諮詢摎廣播，桃園市薪傳師協會義不容辭擔負這份責任，我乜有幸參加這 27 年來桃園再度舉辦全國性个燈會，參與志願服務工作，人講：口說不如身逢，耳聞不如目見，親身去作，正知一隻活動愛圓滿，需要盡多个人力、物力、良好个規劃、認真个執行、大家个合作。三月二日下晝二點愛到第一號服務台報到，因為歡喜有機會參加這有意義个全國性燈會，我一點半就到咧!一方面想愛享受鬧熱燈會个氣氛，欣賞花燈，二方面驚講坐巴士無辦法準時到，提早兜到會場好準備，吂知，志工服務登記好勢，就看著現場人群一陣接一陣，我就煞煞著著大會準備个裌仔加入𢯭手服務，可能係前暫仔寒流，今晡日天氣較好，主燈區个遊客陣打陣企著淰淰，現場逐位都擠擠个人著該欣賞。

第一號服務台，高鐵站下車个第一站，當方便，這有交通部觀光局派來个服務人員摎本市各單位志工，歸下兩排座位十過儕。我本旦係在第二排个客語諮詢，看著頭前第一排幾下組个志工愛發手冊、指點路線、問便所摎遊客解說免費借用娃娃車摎輪椅个手續、歸還个方式，又愛將倉庫个娃娃車摎輪椅一一登記、收證件、交車仔指導使用，人手毋罅，搣著無閒直掣，我遽遽𢯭手從倉庫將原本收等个娃娃車、輪椅打開，檢查有壞忒無，報號碼分登記个志工，加一雙手腳，生事就順利加盡多。翻轉頭看著第二排个志工有人著該劃手機仔，心肝肚想既然愛來做志工仰般毋肯停動，坐著該劃手機實在盡毋好看相。

匆忙走入服務台个一定係緊急需要服務个，一個婦人家講，厥老公毋見咧，一個妹仔个阿爸失散咧，一個家長講四歲个細人跌忒咧，有一隻大陸團體八十零歲个團員尋毋著，另外有兩位後生个拈著一個細人仔，全部愛廣播，老人家毋會聽國語愛講學佬，龍潭來个一儕斯會聽客；還愛拜託善心人士將看到著該種衫褲色水个老人家帶到服務中心。我𢯭手廣播學佬摎客話，該載，該日所有廣播做下圓滿尋著。廣播个志工問我哪量時下班，佢講大哥十點正會走，分佢心肝當定貼。最生趣个一件事情就係一位借用輪椅个先生將厥丈人佬 3 號服務台借个輪椅拿來一號還，我話著係原來摎醫療急救站商借出來紅色坐墊仔該輛，證件毋收好勢續跌忒證件，結果係共色个輪椅，借用位所不同，厥丈人老趕過來正知毋係在一號借个。

紅羅花色，各國人士，各種語言摎各種服務需求，對於服務台係多重个考驗，乜證明主辦單位靡細个事先規畫準備。一日下來，除忒坐等食夜，歸日著用企，雖身體有兜悿，但係精神暢樂，因為逐儕都係帶著「客家」使命來个，看到所有大家服務過个人，通體笑瞇瞇合講承蒙个離開，這係大家合作用愛心摎犧牲个精神換來个，這次分我學盡多，其中人生智慧盡重要一句話「拳頭毋打笑面人」。

 

▲BACK