𠊎个故鄉—鳳林

【文圖∕徐家豪∕客語薪傳師】

 

在花蓮市順等臺九線省道下南，經過吉安、壽豐、溪口，大約四十分鐘个車程就來到鳳林。鳳林係花東縱谷項一個當有特色个客家小鎮，人口正萬過人，毋過客家人就佔了六成五，還係全臺灣唯一經過國際慢城組織認證通過个慢城。

鳳林个舊名安到「馬里勿」，係阿美族个話，意思係「上崎」，頭擺這位森林茂密，有一種植物安到木蘭，會纏等高大个樹仔生長，該分木蘭纏等个樹仔遠遠看過去，形投就像鳳凰鳥展翼，當時來鳳林開墾个漢人，看著恁樣个樣相，就摎這位安到鳳林。鳳林係東部主要个客家聚落，有九成个客家人係對新竹、苗栗遷徙過來个，大部分係講四縣、海陸个客家話，係一個典型个客家莊，這下摎大家
紹介鳳林个觀光景點、名產摎客家美食。

菸樓聚落：日本時代在這下个北林里、大榮里設立移民村，有學校、警察廳、神社。因為日本政府推廣種植菸葉，起當多焙菸葉个菸樓，一直到民國八十年因為政府个政策，就無再過種菸，菸樓也漸漸欸歿忒。好得鎮公所向客家委員會爭取經費來整修，這下也係一隻遶尞摎研究菸樓文化个地方。

校長夢工廠：鳳林个文風鼎盛，培育出百過個校長，故所又有校長鎮个美名，這下在退休个校長摎還在職个校長，爭取經費整修日本時代个「鳳林支廳長官官舍」，成立「校長夢工廠」，裡背肚陳列當多頭擺學校个文史資料。

新光兆豐農場：農場肚有歐洲式个花園、木造个民宿、青溜溜仔个大草坪、草藥花園、觀光果園，佔地十八公頃，在這位做得行環湖步道欣賞湖光山色，也做得在大草坪放紙鷂仔、擲飛盤，輕輕鬆鬆个享受大自然个自在。

林田山林業文化園區：又安到摩里薩卡（日本話），早期日本人在這位伐木，建有運木材个鐵道、聚材區、員工宿舍、學校、消防隊，係一個生活機能齊全个伐木社區，一直到民國七十七年，因為禁伐天然林个政策，就無伐木了。這下還保留完整个日式建築群，還利用舊个建築，展出早期伐木个工具、相片等史料，係來鳳林遶尞一定會來个景點。

客家文物館：館藏當豐富，紹介花蓮客家人開墾个歷史、客家人个信仰、交通、生活工具、傳統服裝、居家設施、產業、經濟等。

剝皮辣椒摎香酥地豆：係鳳林个名產，剝皮辣椒係農會摎廠商合作，農會輔導農民成立產銷班，種辣椒仔，辣椒仔收成賣分廠商加工製造剝皮辣椒。香酥地豆係用在地種个地豆，除忒農會本身个品牌之外，也有已多賣地豆个店仔，各有特色。這下个剝皮辣椒摎地豆也係來鳳林遶尞个人客盡好買个等路。

韭菜臭豆腐：在鳳林國小个對面，有一間賣臭豆腐个店仔，賣个臭豆腐當有名，一般來講食臭豆腐係合泡菜共下食，毋過這位个臭豆腐係合生个韭菜，分人食著還會尋味。

紅豆牛乳冰：明新冰果室係觀光客一定會去个冰仔店，紅豆牛乳冰摎檸檬汁最餳人。

滿妹豬腳：在萬里橋（長橋里）有一間豬腳店遠近有名，滷个豬腳酪酪虬虬，
逐日到了食飯時間就淰淰个人客。

在這位做得放慢腳步，慢慢仔欣賞鳳林个好山好水，慢慢仔享受鳳林个客家美食，慢慢仔品味後山个客家文物摎百年風華个歷史建築，慢城鳳林歡迎大家來遶尞。

（本文以四縣腔寫成，作者徐家豪老師是花蓮縣鳳林鎮人，目前定居桃園市平鎮區，自軍職退休後，投入客語教學工作，成為經驗豐富的資深客語薪傳師，曾獲桃園市政府教育局、桃園市政府客家事務局於104年10月及12月頒發感謝狀）

 

徐家豪－聲檔

▲BACK