落氣

【文／羅肇錦∕中央大學客家語文暨社會科學學系榮譽教授】

 

客家人歇在山區，環境氣候適合種茶，故所各地客人對泡茶這件事情，就非常熟絡。比將講愛用樣仔个茶壺、愛煮樣仔个水，一壺茶愛放幾多茶米？滾水倒在茶壺愛泡幾久正做得斟出來分人食？這肚項還有一項一般人無麼个會注意个末節，該就係煮滾个水愛等佢「落氣」正拿來泡茶，泡个茶較香，茶米也較耐泡。

客話个「落氣」就正用在煮滾水定定，形容壺仔、镬仔拋拋滾架下熱氣沖人，等燒氣落下去，毋會壺肚水緊滾，壺喙氣緊噴，該種情況就按到「落氣」。

用「落氣」个滾水泡茶、泡咖啡，毋單只毋會熝著人，也毋會熝壞你愛泡个東西。因為有都東西質較軟當遽熟，用特滾个水泡，一下就熟忒，像煮个樣仔，該就變到「煮茶」，毋係「泡茶」。東西愛用泡，就係愛保留厥香氣，毋好忒熟會爛忒，有香氣有未緒个東西，拿來用滾滾个水泡久久，浸到綿綿爛爛，該比煮還較慘，包你好食个東西變到毋味毋緒 。

換一隻角度來看「落氣」，也做得講做事情毋好在興頭項，興fet fet仔無考慮就擂頭去做，輒常會「成事不足，敗事有餘」，故所有經驗个人會勸話你「凡事三思而後行」正較穩當，就係這樣个道理。

一下人，泡茶較無講究「落氣」泡茶，做事也較無耐心去「三思而後行」，不管做麼該就愛趕遽、愛搶先，驚藤人無著會輸人輸到淨淨。結果漸漸仔就豁忒「落氣」這隻當有意思个詞彙，大家變到想愛樣仔就樣仔个現代「過動兒」。

 

羅肇錦教授 聲檔－落氣

▲BACK