起勢

 

【文／羅肇錦∕中央大學客家語文暨社會科學學系榮譽教授】

 

 

輒擺開運動會，看人走相遽仔。比賽個人be be 企在畫好个白線唇項，兩隻手輕輕仔傪到白線邊唇，「各就各位，預備---」 个个選手就屎窟孔孔，頭那傾傾，「起勢」愛走了，等裁判銃仔一響，大家拔腳拼命仔走到兩腳無貼地。
講到這，大家過想一下「各就各位，預備---」，選手就屎窟孔孔，頭那傾傾，該種姿勢就係大人走相遽个「起勢」。 假使一下換一個細人仔，看著阿爸分厥哥兩粒糖仔，自家正分著一粒，就兩粒目珠看來看去，比來比去，樣涯比人較少，
心肚緊想緊毋像勢，毋故又毋敢講。結果，細人仔个喙緊來緊扁，氣急急仔硬硬就愛開聲噭，該就細人仔愛噭个「起勢」。這搭仔講个「起」係開始，「勢」係樣仔係形仔，故所起勢就係「愛開始个樣仔」，細人仔分忒少糖仔「愛開始噭个樣仔」，大人走相遽仔，屎窟孔孔，頭那傾傾，「愛開始走个樣仔」，全部按到「起勢」。
「起勢」係「愛開始个樣仔」，該其他還有當多其他「愛開始个樣仔」，像「起鼓」，係講做戲 「愛開始做戲个樣仔」，先打鼓仔來同現場个氣氛炒分佢熱棚。
「起性」，係講對人變面「愛開始發譴个樣仔」，先改變本來好好个樣仔，變到失忒本來个樣仔無辦法控制自家感情反應，這就按到「起性」。「起磅」，係講秤東西秤陀「愛開始翹起來个樣仔」，又做得拿來講做事情開始落力專心，不管一切全心投入去做，就按到「起磅」。

羅肇錦教授聲檔 － 起勢

▲BACK