做戲

 

【文／羅肇錦∕中央大學客家語文暨社會科學學系榮譽教授】

 

 

客家人用「做」个東西當多，像「做人」「做事」「做大水」「做天旱」「做中人」「做目匠」「做戲」「做生理」---等等一大堆，差毋多有人開喙講話就會有「做」這隻詞。下背恩來講「做戲」。
    做麼个「戲」係用做个，國語係講「演戲」，連鶴老也講「演戲」，就存著\客話硬講「做戲」。
    客家人做戲有當多種，像用民歌來搭表演加裝扮，去做簡單个故事，就安到「小戲」。小戲用好笑个、諷刺个、鬧熱个內容為主，做得充分表現民間生活，表演架下有兩旦一丑，故所按到三腳班，在台灣就係有名个採茶戲。
    另外做神戲演出个平安戲，按到「大戲」，大戲比較正經，一定愛著正式个戲服，愛行一定个腳步，愛掞馬尾，愛唱各種唱腔，愛做一定个戲齣。尤其演歷史劇盡多，像「薛仁貴證征東」「薛丁山征西」「關公過五關斬六將」「薛平貴同王寶釧」等等。

    除忒「大戲」「小戲」以外，也有布袋戲、福祿班、掌中戲，可惜民間一般看著个差毋多就係做鬧熱个大戲同閒時个「撮把戲」定定。該在「戲」係用「做」个，故所逐擺「做」差不多內容个戲，大家也就共樣，看到有來有去。

 

羅肇錦教授聲檔—做戲

▲BACK