最感動个事情

【文∕羅金珠∕中央大學客家語文暨社會科學學系在職專班碩二生】

 

感覺還看得著佇日頭下行啊行仔、休息佇門碫下个兩子阿公。在「日頭下」、「門碫下」，有𠊎細人時節最深个記憶。

在這位摎阿公共下笑，逐擺阿公歡喜就會分糖食；在這打潑賴，因為恁樣形使做得摎阿公坐兩對面，挷等阿公長長摺摺个喉嗹胲皮；也識在這大嫲鼓聲噭過、蹬腳張人過，因為阿公講：「請人客，細人毋好上桌。」

毋多知，阿公過身忒30空年咧，早使毋識遇到還有像頭擺「請人客食飯，細人做毋得上桌」个事例囉！

去年（2015）年初一，天朦光，摎佇平鎮个印尼客家鄉親官大哥、士林个阿釗牯，共下坐飛行機直接飛到雅加逹(Jakarta) (Jai Ka That)，接等到坤甸(Pontianak)(Khun Tian)、山口洋(Singkawang)(San Kheu Jong)、萬那(Landak )(Ban Na)，背尾到假獅(Jawai )(Ka Si)，總共9日个行程。

行阿行斯毋單淨尋南洋客家个風情定定，在該位感受到南洋鄉親个熱情摎台灣無共樣个客家過年民俗。毋過，到官哥个故鄉萬那該量時，該種「有人客食飯時，細人在門碫下等」个記憶，又飆上心肝頭，黏時目汁斯像泉水樣險險哱（註1）出來。

下晝三點零到萬那，拜訪官哥个二哥，接面聽著个聲音係親切又迷迷糊糊个南洋客家「軟譮（話）」（註2）；六點空仔，在二哥个妹子屋下食夜。該位滿堂个子子孫孫歸籠群，大大細細十過過儕，細孲仔踵上踵下（註3）、大人斯打嘴鼓、溜麵線，十分鬧熱。人講啊：「美不美，山中水；親不親，故鄉人。」在這𠊎完全感受到印尼客家人極「愛親」个情意。

「好食夜囉 !」

喊上桌个斯有二哥、官哥、阿釗牯摎𠊎四儕定定。毋係桌仔細毋罅坐，也毋係其他人在別張桌坐，主要係佢兜人還遵守保留祖公太个「人客來，細人仔毋好上桌」个傳統風俗。

台灣个時代緊轉變，除忒細人仔時節，緊看大人食飯緊流口水之外，一直到出社會，經驗到个使係加幾張凳仔、加煮幾項菜、較大碗仔加兜添，就毋識看到乜漸漸毋記得「有人客來，細人仔毋好上桌」个舊例咧。

該量時桌面頂，擺等淰淰个菜。二嫂開皮笑面熱情招待，在脣頭緊喊吾兜 「挾!挾!挾啊!」總係毋肯坐下來共下食。該日个生菜、肉氣（註4）一盤過一盤；熟个係佢兜自家个私伽菜，加了盡多个南洋特別香料，鼻著該香味口涎水使叭叭跌喔!詳細一看，嗯！敢講印尼這熱帶地方也有食火鍋、啉麥酒（註5）係麼?

𠊎十分疑狐看等官哥，佢目珠捩啊捩、眨啊眨仔摎𠊎講：「這係主人家特別為台灣客家鄉親做準備个。一方面驚怕你兜對印尼食雜食毋慣，二方面也係主人家个誠意。」聽了過後，對這份情个感動，正經係飯合菜合目汁間等共下吞吞落做一肚喲！

該種強強毋記得个細時記憶，嗄在天西呂宋芭拉加（註6）个所在堵著，這種感動在𠊎个心肝頭一直硑硑砰砰，久久停毋下來。
（本文以海陸腔寫成，上圖右後方即是作者）

最感動个事情—羅金珠聲檔

註1：哱—動詞「噴」的意思。
註2：譮，海陸腔「話」曰「譮」。所謂「軟譮（話）」等於係台灣所講个四縣腔。
佢个分別區在百富县松柏港( sungai pinyuh)，往坤甸个方向係講「軟譮」；
往山口洋方向个係講「硬譮」，也就係恩俚所講个海陸腔。
註3：踵—其意為「跑」，踵上踵下為跑來跑去。
註4：印尼國家係毋食豬肉个國家。
註5：啤酒，約印尼盾3000鐳，差毋著係臺灣錢70-100个銀，在印尼是極高消
費的飲品。
註6：呂宋芭拉加，係形容非常遙遠个所在。

 

▲BACK