伯公

【文／羅肇錦∕中央大學客家語文暨社會科學學系榮譽教授】

 

世界上每一畲人，一生人所用个東西，所食个食物，講較膨風兜仔，恩人日常食衣住行所用到个一切東西，差毋多就係土地所生產出來个。種麻織布愛靠土地，種禾種麥也愛靠土地，種樹種竹靠土地，挖泥鑿石也靠土地，這兜樹竹石泥用來做屋、造車、鋪橋、整路，總講生活个微抹末節，一切都靠土地來提供。

因為土地對人有恁大个意義同功能，故所人民百姓自自然然就會對土地感恩，對土地敬拜，對土地愛惜。大家就拜土地，係正常个心理反應，但係客人最特別，對屋邊个土地就神感心之餘還將佢按到「伯公」，因為伯公日日在若身邊保護你，恬恬靜靜，無多講話，就像隔壁鄰舍个阿伯樣仔。

恩這兜人，日常拜天神天公、拜觀音菩薩、拜關爺恩主、拜灶神門神，各地就拜共樣个「真神」，像共樣个天神、共樣个菩薩、共樣个恩主、共樣个門神。較無共樣个係山神、河神同土地神，各个地方拜个係各地方特有个神。

像若屋家拜若屋邊个伯公，吾屋家拜吾田頭伯公，可見土地伯公係個人屋邊最親切最關心最重要个神。除特過年過節會去敬拜，日常生活燒燒冷冷，毋順序个事，毋鬆爽个身體、無知愛樣仔正好个感情，全部就會拿去問伯公，求伯公保佑、求伯公指點、求伯公幐手。

伯公無只保佑人，佢還愛提供場所分大家坐寮、寄雨、抵涼个，大家不管發風落雨，抑係日頭忒辣、手腳酸軟，就遽遽入去伯公下尞。

 

羅肇錦教授聲檔—伯公

▲BACK