從教育个角度，來看客家民間信仰—清明掛紙

【文／豆漿】

 

每年二月初二伯公生過後，堵著放尞日，就會看著在平時無人个牛埔仔有人在掛紙，老嫩大細共下行，手項大環細環，一看就知係共家族个，大家共下來掛紙，有講有笑盡歡喜哦！
「掛紙」做得講係客家人盡重視个節日，因為對客家人來講，「舉頭三尺有神明」不管係麼个時間、麼个地方，祖先都在唇口保護捱等。「掛紙」毋單淨係一家人，係歸吔家族共下來敬祖，就像係屋下个祠堂，就係要提醒捱等祖先係一脈一脈、煞忙打拚，人講：「無天就無地。」無先人个打拼，就無今晡日个捱等，故所「飲水愛思源、敬祖愛感恩」。
記得，有一擺阿婆就同捱等講一个故事，頭擺有一个皇帝，因為在外地打戰，很多年沒歸去，歸到家鄉想要去爺哀个塚埔唱爺，但係太久毋歸來，草生到比人還高，煞尋毋到爺哀个塚埔，大家尋耶盡久都尋毋，个皇帝就拿仔一張銀紙，求爺哀个魂做得讓佢等尋到塚埔，結果一陣風就將銀紙吹到一个塚埔上面，一看原來就係皇帝个爺哀个塚埔，故所後來个人都會在塚埔項壓銀紙，這就係「掛紙」个由來。
每年个掛紙，捱定著毋會跌忒，掛紙前一日暗埔，所有叔婆、伯姆、阿叔、阿伯全部都會歸來，大家鬧熱吱咂，共下準備隔日掛紙个牲儀，阿爸阿姆都會特別交代捱等細人仔，因為掛紙要尊敬祖先，要有感恩同尊敬个心，故所唱爺个時節做毋得在唇口走上走下、大聲玩樂。
到耶掛紙个日，大家打早就亢床，因為這日係鄉公所訂吔日仔，大家定著都會歸來，常常造成路項車仔塞著過毋得，故所要早一點去著牛埔仔。一到牛埔仔，大家就分頭去做各種掛紙个事情，鏟地、擺牲儀、倒茶、點香，記得還細个時節，阿婆都會給捱等細人仔一疊銀紙，要捱等拿石頭去塚埔个「掛紙」，捱等細人仔都會講个係起屋仔，等到大家都準備好耶。讓阿公阿婆帶著大家唱爺，感謝祖先个保佑，讓歸家人平安順利。唱爺過後，大人仔燒銀紙、打紙炮，將塚埔整理乾淨，就結束一年一擺个掛紙耶。
隨著時間盡過，捱个年紀越來越大，也離開屋下到外地讀書，掛紙在捱心肚仔變成一个特別个日仔，不管事情亦多，車票亦難買，捱絕對要歸屋下來掛紙，有一擺歸屋下掛紙，看到新聞報導有人在網路項請人代掛紙，只要看等電腦就做得唱爺，還有人燒車仔、手機、名牌包包這些，阿婆看到盡搖頭：「頭擺人掛紙係做得讓在外面工作个子女歸屋下看爺哀，拜祖先拜仔係一个心意，現下掛紙請人代掛，燒在多个東西，都比不上自家掛紙，怎麼做得這樣呢?」
阿公接著講：「頭擺毋辦法孝敬祖先，掛紙至少係表達感謝个心，老古人講个：『還生食四兩，當過死後拜豬羊。』燒按多東西還係比毋過歸來屋下陪爺哀卡實在啦。」
現下時代進步，但係每年歸來掛紙个人越來越少，牛埔仔个草越生越高，係毋係講大家越來越少歸來看爺哀、陪爺哀，老古人講：「面前有佛不拜，煞到西方求佛。」在外面求神保平安，煞不歸屋下敬祖、孝敬爺哀。「掛紙」係中國人優良个傳統，因為捱等知道要歸家人歸來準備牲儀、唱爺，感謝祖先，最重要个就係要歸屋下同爺哀團圓，毋係嗎?
（本文以南四縣腔寫成）

 

 

 

▲BACK