可能

【文／羅肇錦 (國立中央大學客家語文暨社會科學學系榮譽教授)】

 

本單元个名仔係「試說舊語」，無過今餔日个題目「可能」，堵堵同本單元个要求相反，因為「可能」毋係舊語顛到係新語，係近代官話影響正吸收入來个新詞彙，講佢係舊語，實在忒過分。
既然忒過分，該涯做麼介還愛拿出來討論呢？涯目的當簡單，涯愛講个係客家話除忒可能以外，還有麼个做得來表示「可能」。 在這位涯大概想著个有「險怕 」「驚怕」兩隻，另外拿「敢係」「險險」來做比較。
首先來講「險怕 」，「朝晨恁好天又堵著禮拜，高速公路險怕會塞車」「落恁大雨，無帶遮仔，險怕會涿濕。」，這位个「險怕 」同國語「恐怕」盡相像 ，旦係用「險怕」也共樣沒問題，就像面前个句子「高速公路險怕會塞車」「險怕會涿濕」做得換成「高速公路恐怕會塞車」「恐怕會淋濕」，但係用「可能」也無麼个差別，翻成國語「高速公路可能會塞車」「可能會淋濕」，可見客話个「險怕」相當國語个 「恐怕」「可能」。
續下來講 「驚怕」，恩用面前个例仔「朝晨恁好天又堵著禮拜，高速公路驚怕會塞車」「落恁大雨，無帶遮仔，驚怕會涿濕。」，兩句都用到堵堵好，故所恩做得在這做一个結論客話个 「險怕 」「驚怕」相當於國語个「可能」「恐怕」。其他「敢係」相當於「怎麼是」，「險險」相當於「差一點」，像「這支遮仔敢係若个？」（這支雨傘怎麼是你的？）「朝晨宕睡害涯險險無赴到第一枋車」（早上睡過頭害我差一點沒趕上第一班車。） 。

 

可能__羅肇錦教授聲檔

▲BACK