捩當轂

【文／羅肇錦 (國立中央大學客家語文暨社會科學學系榮譽教授)】

 

割禾緊工，大家無閒，田項斛桶扛上扛下，有兜人腳踏斛桶，手拿禾把，緊踏緊絞，毋多知仔又割好一坵。有兜人頭傾傾仔，在扳篁項罅稈揉，有兜人禾鐮仔伸出去拉入來，伸出去拉入來，無多知仔就割好一大排。
打好个榖，一籮一籮，兩籮一擔，塏到禾埕項曬。曬榖價下，還愛用榖摥仔摥來摥去，恁仔正做得下背頂項个榖，全部曬得到日頭。
榖曬燥誒，愛趕天時好，遽遽扛出風車來攪榖。攪榖个人，左手扳等漏榖个栓仔，右手殺力牯攪風車，風車緊攪就緊捩，捩到當轂當轂，大風就會將草削仔同胖榖，吹飛出去。半精胖个二槽仔，就漏到第二隻擋榖槽，精榖較重，飛無恁遠，正會漏到第一槽。這第一槽个精榖，就係耕種人辛苦歸半年个希望。
有兜風車還會分出第三槽用來裝盡精盡重个榖種，該愛留來捼秧仔个榖種。攪好个精榖同胖榖愛分開來，盡重要个就要靠風車來攪當轂，正有辦法分清楚。係無風車較轂轂來分榖種，淨用人工來，一粒一粒抩，該毋知愛抩到奈央時正得。
故所風車緊捩係攪榖个基礎動力，風車「捩當轂」係分出榖種个結果，也係耕種个成果。

 

 

▲BACK