正來嬲

【文／羅肇錦 (國立中央大學客家語文暨社會科學學系榮譽教授)】

 

客話「正來嬲」个「嬲」，不管山歌詞， 抑係民間故事童謠傳說，早期个文字記錄，全部就用這隻兩男一女所構成个俗字「嬲」。毋過這十過年來，為著提倡客家文化，鼓勵大家用客語漢字來寫作，結果，認真去查字典，發現這隻「嬲」字，漢音愛讀「鳥」，係糾纏个意思。係講大家繼續用這隻字來寫「有閒來嬲」「嬲加一下」，對以後个子孫抑係無會講客个人，去查字典了後，會懷疑當代个客家人罕無意思吶？哪有人緊喊人有閒來糾纏該呢？哪有人緊喊人再過糾纏一下該呢？
尤其一下性別平等个時代，兩男一女个「嬲」這隻字眼，加上係糾纏个意思，定著會分大家嫌到臭餿。故所背尾就有人建議用聊天个「聊」，毋過聲調無著，用久會變「來聊天」个意思。背尾又有人建議用同音字，採用料理个「料」做得緊講緊食各種料理。再背尾就討論出「尞」字，這隻字同「星星之火可以燎原」个「燎」共音共義，但係一般人無用「尞」來表示火燒个意思，賭好拿來做「正來嬲」「有閒來嬲」个「嬲」，故所在大家同意下全部改用「正來尞」「有閒來尞」。厥个意思改變過程係「嬲」（糾纏）→「聊」（聊天）→「料」（料理）→「尞」（火燒）。
最背尾崖去查著，畬族人唱个歌謠就按到「嬲歌」，係有男有女對唱个形式，故所佢這兜用「嬲」這隻漢字，來表示男女對口演唱个形式。再過深入研究客人其實就係畬族人轉化過來个，正會「山歌」同「嬲歌」恁相像。「坐下來，嬲下來，做到鵝毛沉落水，嬲到石頭浮起來。」 共樣有用「嬲」个傳統。恁樣看來站在傳統淵源个立場「正來尞」 愛改倒轉來用「正來嬲」正好。

 

 

正來嬲__羅肇錦教授聲檔（音檔內容請使用ＩＥ瀏覽器執行）

▲BACK