瓜鬼

【文／羅肇錦 (國立中央大學客家語文暨社會科學學系榮譽教授)】

 

新種個菜瓜，辛辛苦苦淋水、放肥、搭棚、遞藤，慢慢誒開花、夾子，細人仔跍到脣項，看著黃黃个花，生到像手指公恁大仔菜瓜子頭那頂，試著當等人惜，就用手去揬，當時恅著生趣好搞，哪知過無幾多日，菜瓜子續慢慢誒變燥變烏，連花帶蒂落淨淨。看著恁樣个情形，大人就會罵：「手恁賤無會拿來剁忒去，你毋知佢恁瓜鬼喔，花過子分人摸過就會死忒。」 喔！原來「恁瓜鬼」个「瓜鬼」就係恁樣來个。
瓜鬼除忒瓜仔類个開花打子恁瓜鬼以外，像貓麻供子，係講貓子分人摸過，佢轉來一鼻就知有人來摸過厥貓子，跈等就含等貓子徙到別位去，故所輒輒搬屋同輒輒換位子个人，也常被說成「貓屣竇樣仔恁瓜鬼」。
至於專指一個人忒淨利洗啊忒又愛過洗，也是瓜鬼。其他像做事情要求多明明做好了差無多就做得了，結果佢又還這講該講這嫌該嫌唸無會煞，也會分人批評恁瓜鬼。當然用來批評人要求多恁瓜鬼，同瓜仔打子開花動毋得个瓜鬼，無麼共樣，但係做人个瓜鬼，同貓麻供子个瓜鬼、瓜仔打子个瓜鬼差毋多，差毋多就係恁「鬼」，故所本來愛有「人鬼」「貓鬼」來同「瓜鬼」共下用正著，一下為著統一，為著簡單好學，不管人抑係貓仔，抑係瓜仔，凡係有這種情形該就按到瓜鬼。總講客話个瓜鬼 ，係無分植物無分動物抑係人，全部就會變一種鬼，該就係「瓜鬼」。

 

 

瓜鬼__羅肇錦教授聲檔（音檔內容請使用ＩＥ瀏覽器執行）

▲BACK