打結同打當結

【文／羅肇錦 (國立中央大學客家語文暨社會科學學系榮譽教授)】

 

「結」 這隻字本來係講「當多絲線纏共下」个意思，故所將柴草用索仔搨共下拿來起火个細柴把按到「草結」，係講當多索仔纏共下解不開按到「打結」，同別人解毋開个或者誤會就按到「結冤仇」。再下去係講樹頂開花打子又按到「結子」，結子滿樹按到「打當結」。
客話對一粒果子个成長過程所用个詞彙同人無共樣，從「點仁」「爆芽」「生筍」「抽莖」「生葉」「遞藤」「開花」「落蒂」到「結子」，全部係當有意思个構詞，恩拿「點仁」來開始講：
種瓜仔架下，爬好地泥盡先愛做个事就係選好瓜仁泥上挖一隻細空仔，仁就種落去就按到「點仁」。
仁點入去拿泥揞起來，淋一息水幾日仔就會看著生出嫩嫩个芽，該就按到 「爆芽」。
芽緊生緊長，嫩筍緊爆緊多就按到「生筍」。
筍生出來，正開始就一條直直个筍，跈等無幾久叉杈个位又會爆出新个筍，新筍緊生緊長就按到「抽莖」。
瓜藤抽莖要吸收養分，故所就愛有葉仔正有辦法製造養分，故所就會煞猛「生葉」。
莖當多葉當靚，藤仔就會緊生緊長，搭著東西就纏歇歇，這就按到「遞藤」。
藤長葉靚時期到了就會「開花」。
花開當多愛有蜂仔蛾仔擛仔來傳花粉正會結子，結子沒幾久就會「落蒂」。
存下來个就係細立正打成个果子，等果子大了熟了正摘來做種煮食賣錢。
這就係果子个一生，也係農人的一季。

 

 

打結同打當結__羅肇錦教授聲檔（音檔內容請使用ＩＥ瀏覽器執行）

▲BACK