一畬人

【文／羅肇錦 (國立中央大學客家語文暨社會科學學系榮譽教授)】

 

「畬」這隻字本來係閩粵贛山區个人歇个屋仔，背尾因爭个兜人全部係燠埔園用火灰泥種芋仔、蕃薯、薑麻、沙葛---等作物來維持生活。故所附近个人就用喊佢兜按到「畬」，後來辭典就解釋「刀耕火種為畬」（《廣韻》）。這隻字就係客話常用个「一畬人」个「畬」，也係「麼畬？」个「畬」。
   台灣客家界，使用漢字「儕」來表示「畬」，係借義使用所誤用的字，不管音抑係義，都有差誤，但係大家就甘願用毋著个「儕」字，無肯接受用來表示刀耕火種个族群名「畬」字。做麼个會恁尷尬呢？崖想可能受中原沙文主義影響，大家毋願承認客人同畬族个關係，故所講著畬就變到異無面子樣仔。
    毋過從詞彙的結構來看，苗栗客人个客話「麼人」同「麼畬」共樣就係國語「誰」个意思，既然「麼人」就係「麼畬」，可見「畬」就係「人」个意思。另外有兜地方个客話（像潮州揭西河婆話）正做得講「一畬兩畬三畬」做毋得講「一畬人兩畬人三畬人」，這也做得證明客話「畬」就係「人」个意思。
    「畬」就係「人」這種族群名，本來就係厥个語言「人」个意思，在當今語言肚項恁樣例仔多到講唔得，像台灣原住民話，差毋多就該族个族名，就係該族語言「人」个意思。最堵好个係今晡日瑤族人最多人講个話，按到「瑤勉」，佢个「勉」音mien，也是人个意思，同「畬」就係「人」共樣共樣無走樣，加上瑤畬都係發源在湖南，都信仰盤瓠，後來都在閩粵贛山區生活，佢這用个基礎詞彙也當多音義接近个，故所從以上種種情形看來，客話「一畬人」个「畬」本義就係人个意思。

 

 

一畬人_羅肇錦教授聲檔

▲BACK