定疊

【文／羅肇錦 (國立中央大學客家語文暨社會科學學系榮譽教授)】

 

在生物界，各種活動能夠安穩停妥下來个境界，就係「定」。古書講：「知止而後有定，定而後能靜，靜而後能安，安而後能慮，慮而後能得。」這其中个第一階段講个就係「知止有定」。知止有定个「定」字從說文解字來看是從宀緬從正，係講定係心靈思維个最基本功夫。
    故所，用「定」去結構个詞，客家話用法無多，輒看到个有定疊、定著、定婚、定貨、定桌等。都係講事情決定以後，就做毋得反悔，做毋得改變个意思。這恁多隻詞當中，這位愛指出个「定疊」就係講事情完成，情況穩定，像兩個東西疊起來穩正又妥當。因為「疊」係東西層東西，愛層來多，定著愛尋面大、重心低个東西來疊，正有辦法疊來高又穩，普通會想到个係，用又扁又平个東西來疊一等穩，甚至穩到黏等樣仔，穩穩毋會停動。難怪「疊」字个讀音同「貼」字相當接近，可能因為疊起來就像貼起來樣仔。
    既然「定」係各種活動完全安穩停妥下來个境界，「疊」又係穩到黏等樣仔穩穩毋會停動。个恁仔講「定疊」就係事情有關个各方面就準備妥當，毋會在過變化改變个情況。
    毋過比較字面个安定疊穩，同客話輒用个定疊無麼供樣，大家較熟个定疊係講事情做來定疊，比東西放來定疊較普遍。可見客話用定疊个修飾意義，比字面意義又定又疊還較深个用法。

 

 

定疊_羅肇錦教授聲檔

▲BACK