好先同細義

【文／羅肇錦 (國立中央大學客家語文暨社會科學學系榮譽教授)】

 

台灣客話係大陸各地客話个大混雜，因為福建、廣東兼海各縣市，差毋多就有客人來台灣開墾。加上國民政府來台，帶來還較多地方个客人，該在人數無多，顧所影響無恁大。比將一句「謝謝你」，四縣講「恁仔細」、海陸講「承蒙」、大埔講「勞瀝」、六堆講「多謝」、詔安講「勞力」，這種差別目前因為台灣推廣客家話，大部分人都知，就會聽。但係像海陸个「好先」「摎」、四縣个「細意」「同」，抑係美濃个「同」講gan31大埔个「痛」講「疾」、饒平个「水」講fi31、詔安个「倈仔」講「建仔」第 一擺聽到架下，包你抓無頭搨。
    在台灣四縣人講「細意」「恁細義」，係講客氣、恁客氣个意思，同「仔細」「恁仔細」係講感謝、當感謝个意思。全部係形容對人照顧非常用心，麼个微抹末節个地方，都同佢打理到好好勢勢，這正按到「細意」按到「仔細」。也就因為「恁細義」「恁仔細」係形容詞，顧所四縣話做無得講「恁細義你」「恁仔細你」。毋過海陸人毋係恁仰想，佢兜係用「好先」「恁好先」表示客氣、恁客氣个意思，又用「承蒙」「承蒙你」表示感謝个意思，因爭「承蒙」「多謝」「勞瀝」係動詞顧所做得講「承蒙你」「多謝你」「勞瀝你」就四縣个「恁仔細」係形容詞，做無得講「恁細義你」「恁仔細你」。
    盡背尾倒轉來想海陸个「好先」照字面上來看，僅可有好好行到面前个意思定定，行到面前同客氣有麼介關係？這可能還有當大研究个空間，無定用毋著漢字，抑係無漢字來表示。愛等客家子弟慢慢仔來想，看會有較正確个答案無？

 

 

好先同細義_羅肇錦教授聲檔

▲BACK