狗漯火箽

【文／羅肇錦 (國立中央大學客家語文暨社會科學學系榮譽教授)】

 

修辭學有一个格式按到「飛白」，用客家話來講盡難對翻，崖勉強尋一个「狗漯火箽」代表佢。毋過「飛白」係挑事尋毋著个話來對出生趣好笑个結果，「狗漯火箽」係無認真搣無著對應个語詞，相當一般人講个亂散鬥，芋仔恅到番薯。
    比將講在苗栗退休个人，一見面就有一段對話：「恁久搣麼个？」「無啊﹗退休了，在肥料公司上班？」「樣恁好，退休誒，還有好上班」「係呀﹗在陪尞公司陪人尞」。
    另外這半年來崖正退休架下，熟識个人就會問：「退休誒喺？恁久搣麼个呢？」「哦﹗無啦﹗崖一退下來就轉去鄉下老屋个做掌門人」「哈還勁哪，退休誒還去做恁大个掌門人」「係呀﹗日日掌等自家个老屋﹗像係狗仔樣仔。」
    這兩個「飛白」肚項，第一個係利用客話「陪尞」同「肥料」共音，想出來个笑話。另一個係用「掌門人」个客話同國語意思全無共樣，挑挑想到別個意思，所鬧出來个笑話。

    這兩个退休笑話就係用大家當熟个詞彙挑挑「漯」到別隻意思去，就做得產生當有「效」（笑）果个對話。

 

 

狗漯火箽_羅肇錦教授聲檔

▲BACK