貴蔘蔘

【文／羅肇錦 (國立中央大學客家語文暨社會科學學系榮譽教授)】

 

電視廣告最近流行一个詞彙「貴森森」，係臺灣國語个新詞彙，抑係國語借入學佬話个盡新用法，客家人無幾久，崖想也會跈等採用，就像學佬人用「好康」「米苔目」「黑白」全部落差代，用毋著漢字，結果客話本來當簡單做得用「好空」「米篩目」「烏白」來表達个，續跈學佬人用毋著个漢字。
恩日常生活輒常講「貴sem sem me个東西」漢字表達應當寫「貴蔘蔘仔」正著，毋過電視肚个學佬話全部用「貴森森」來表示。假使客話也跈等用這毋著个漢字，下二擺，客家話就會變到亂理亂纂全無章法。大家簡單比較一下就清楚，到底愛用哪隻字正合厥意思。首先，自古以來个四字成語「物以稀為貴」，就指出東西會貴係因為少个關係，故所會貴蔘蔘仔个東西定著當少正會貴。接下來日常用个東西麼个盡貴？答案當清楚係「蔘仔」，因為俗語講「蔘仔就無恁貴」「貴到像蔘仔樣仔」，「像鼻屎恁多仔就愛錢買」。相反的，「森林」「林木森森」堵好係講多到講毋得个樹園正按到森林。
既然，「森森」係講「當多」个義涵，同「蔘蔘」係講「當少」个意思堵堵相反，崖就毋信，了解這兜道理欸，還搞毋清楚，「貴森森」同「貴蔘蔘」哪隻正著？

 

貴蔘蔘_羅肇錦教授聲檔

 

▲BACK