吂知係

【文／羅肇錦 (國立中央大學客家語文暨社會科學學系榮譽教授)】

 

梁山伯同祝英台共下讀書，共間睡目，毋止做日間同學，又還做夜間同學，足足三年零，一直恅到佢係知腹个兄弟，一直到愛轉鄉架下，祝英台前比後比、梁山伯左勸右勸，比比勸勸，做一齣大戲，正了解共下三年个兄弟「吂知係」一個細阿妹仔。
崖從細歇在銅鑼鄉樟樹村个竹圍仔，該位盡多兔仔、蛇哥、雕仔、老鼠、草蜢、山狗太、龜仔、蝦蟆------。毋過崖要講个係崖屋下有一隻貓仔比該兜兔子老鼠不知愛「神」加幾多倍，莫看佢細細仔个身體，但係輒輒會上樹捉雕仔、山狗太，上屋頂、鑽棚仔捉老鼠，最厲害个係會拖比厥身體較大个兔仔轉來，吾姆就順序仔加菜，炒一大碗公澎沛个兔肉。這係五十零年前个事情，近年仔看新聞過苗栗文獻資料，正知火焰山一帶向北，滯到苑裡、三義、銅鑼、大湖各山區，三十年前就有當多生來同貓仔當相像个「石虎」，。看欸這兜新聞資料，崖正想通，五十年前屋下該隻會捉兔子个貓仔「吂知係」一隻石虎。
以上兩則「吂知係」都係用在兩件事情之間，面前心肚認為个事情同背尾得到个結果全毋共樣，就會用「吂知係」來表示，相當國語个「原來是」，也就係客話个「毋想到係恁樣」。

吂知係_羅肇錦教授聲檔

▲BACK